ལ་རྩེ་འམ་དཔའ་མཁར་བསྟོད་པ།

ཡུལ་ལྷ་གཞི་བདག་ལ་བསང་གཏོང་ཚུལ།

བསང་ཞེས་པ་ནི་དྲི་ཞིམ་ཤིང་གི་རིགས་ཙན་དན་དང་། ཤུག་པ། མཁན་པ། འོམ་བུ་སོགས་དང་། ག་བུར། ཨ་ག་རུ་དམར་པོ་དང་ནག་པོ་སོགས་སྐྱེ་དངོས་མང་པོའི་དུད་པའི་མཆོད་པའི་རིགས་ཤིག་ སྟེ་བཙོག་གྲིབ་དང་། སྡིག་ལྷུང་། རེ་དོགས་སོགས་བསངས་བར་བྱེད་པའི་མཆོད་རྫས་སམ། ལྷག་པར་དུ་ཡབ་མེས་དུས་ནས་མཆོད་ཅིང་བཀུར་བའི་ཡི་དམ་ཆོས་སྐྱོང་དང་ཡུལ་ལྷ་གཞི་ བདག ས་བདག མཛོད་བདག གཏེར་བདག་ཐམས་ཅད་དང་། ལྷ་ཀླུ་གཉན་གསུམ་ལ་རོ་མཆོག་དྲི་ཡི་མཆོད་པ་འབུལ་སྲོལ་ཞིག་ཡིན། བསང་ལ་སྒོ་བསང་དང་། ཕུག་བསང་། ཐབ་བསང་། རི་བསང་། དེ་བཞིན་དུ་བརྒྱ་བསང་། སྟོང་བསང་སོགས་ཡོད་ལ། ལྷ་ཁང་། འདུ་ཁང་། མཆོད་ཁང་སོགས་ཀྱི་སྒོ་ནས་ཀྱང་བསང་གཏོང་སྲོལ་ཡོད། བསང་གཏོང་བའི་དགོས་དམིགས་ནི་སྐྱབས་གནས་དཀོན་མཆོག་གསུམ་དང་། ཡི་དམ་ཆོས་སྐྱོང་སྲུང་མ། ཡུལ་ལྷ་གཞི་བདག་སོགས་ལ་མི་གཙང་བའི་རིགས་ཀྱིས་གོས་པའམ། དམ་ཚིག་ཉམས་ཆག་ཤོར་བ་དང་། དེའི་རྐྱེན་གྱིས་རང་ལ་གྲིབ་དང་གྲིབ་ནད་དང་གདོན་བགེགས་བར་ཆད་ངན་པ་ཅི་བྱུང་ ཐམས་ཅད་སེལ་ཞིང་། ཚེ་རིང་ནད་མེད་དང་། སྒོ་ཕྱུགས་སོགས་ལ་གོད་ཀ་མེད་པར་རྒྱུ་འབྱོར་དབང་ཐང་ལྡན་པར་བྱེད་པ། ལམ་ཐོག་གི་དགྲ། མ་རུང་བའི་རྐྱེན། འཆི་བདག་གི་བདུད་སོགས་ཞི་བར་བྱེད་པ། མེད་པར་བྱེད་པ་ཡིན། དམར་བསང་དང་དཀར་བསང་ཞེས་དབྱེ་བ་བཀར་སྲོལ་ཡོད་པར་གཞིགས་ན་བོད་རང་གི་གནའ་ བོའི་སྲོལ་རྒྱུན་དུ་སོ་སོའི་བཀུར་བའི་དཔའ་བོ་དང་གཉེན་ཉེ་རིང་སོགས་འདས་ གྲོངས་སུ་གྱུར་རྗེས་མགོན་དང་དཔུང་གཉེན་བྱེད་པའི་ལྷ་ལ་བཀུར་ནས་ ཟས་ཀྱི་ཚུལ་དུ་མཆོད་པའི་ཆོ་ག་ཞིག་ཡིན་པར་སྙམ། ཕྱིས་སུ་ནང་པའི་ཆོས་ལུགས་དང་སྦྱར་ནས་རིམ་པར་དྲི་བསང་དང་དཀར་བསང་ཞེས་པར་ གྱུར་ཡོད་མོད། ཡུལ་ལྷ་གཞི་བདག་སོགས་ལྷ་གཉན་མཐུ་བོ་ཆེ་རྣམས་ལ་དེང་གི་སྐབས་སུའང་དམར་མཆོད་ ཀྱི་ཚབ་ཏུ་རྟ་ནོར་ལུག་གསུམ་དང་། རི་དྭགས་སེམས་ཅན་གྱི་གཟུགས་དབྱིབས་མར་རྩམ་སོགས་ཀྱིས་བཟོས་ཏེ་བསང་ལ་གཏོང་ སྲོལ་ཡོད་པ་འདིས་གནའ་བོའི་སྲོལ་ལུགས་ད་དུང་ཀྱང་མ་ཉམས་པར་གནས་པ་མཚོན་ཡོད།

སྐྱེས་དངོས་དང་རི་སྐྱེས་སྲོག་ཆགས་ཚེ་ཐར་གཏོང་སྲོལ།

བོད་ཀྱི་ཚེ་ཐར་གཏོང་སྲོལ་ནི་ " སྲོག་གཅོད་པ་སྤངས་པ་དང་ཁ་ཟས་རབ་ཏུ་སྦྱིན་པའོ་ " ཞེས་རྒྱུ་དང་རྐྱེན་གཉིས་ཀྱིས་ཚེ་རིང་བར་འགྱུར་བར་བཤད། དེ་བས་རང་ཉིད་ཀྱི་རྩ་བའི་བླ་མ་དང་དྲིན་ཆེན་ཕ་མ་གཙོས་གཉེན་ཉེ་དུ་དགའ་ཉེ་ སྤུན་གྲོགས་སུ་ཞིག་གི་ཚེ་སྲོག་ལ་བར་ཆད་མི་འཕྲད་པའི་ཆེད་དང་། དེ་བཞིན་སེམས་ཅན་ཐམས་ཅད་རང་ཉིད་ཀྱི་མ་རུ་མ་གྱུར་བ་མེད་ལ་དེ་དག་རང་ཉིད་དང་ འབྲེལ་ཆགས་སུ་ཡོད་པར་འདོད་ནས་སྒོ་ཕྱུགས་རྟ་ནོར་ལུག་གསུམ་དང་བྱ་བྱེའུ་རི་ དྭགས་ཉྭ་རིགས་སོགས་སྲོག་དང་ལྡན་པ་གང་ཞིག་གི་ཚེ་རིང་དུ་བསྲིངས་ཕྱིར་ཚེ་ཐར་ དུ་གཏོང་བ་དང་། སོ་སོར་བདག་དབང་མེད་པ་ཞིག་ཡིན་ནའང་སེམས་ཅན་དེ་ཉིད་ཀྱི་བདེ་བའི་ཆེད་དུ་རྒྱུ་ ནོར་གྱིས་བླུས་ནས་ཚེ་ཐར་དུ་གཏོང་བ། སྲོག་ཉེན་ལ་ཐུག་པའི་སེམས་ཅན་ཚེ་ཐར་དུ་གཏོང་བ། དེ་བཞིན་བླ་མ་དང་ཡི་དམ། ཆོས་སྐྱོང་། ཡུལ་ལྷ་གཞི་བདག་སོགས་ལྷ་ཀླུ་གཉན་གསུམ་ལ་ཕུལ་ནས་ཚེ་ཐར་དུ་གཏོང་བ། ཤིང་ནགས་སོགས་སྐྱེ་དངོས་རིགས་ལའང་སྲོག་ལྡན་དང་ལྷ་ཀླུ་གཉན་གསུམ་གྱི་འདུ་ཤེས་ བཟུང་ནས་ཚེ་ཐར་དུ་གཏོང་སྲོལ་ཡོད། དཔེར་ན། ཤིང་སྡོང་སོགས་ཀྱི་ཡལ་གའི་ཐོག་ལུག་དཀར་པོའི་བལ་བཏགས་ནས་ཚེ་ཐར་དུ་གཏོང་བ། དྲིན་གཟོ་བའི་ཆེད་དུ་ཚེ་ཐར་དུ་གཏོང་བའི་རིགས་དང་། སོ་སོ་དང་གཉེན་གྲོགས་སོགས་ཀྱི་ཚེ་སྲོག་རིང་དུ་བསྲིང་རྒྱུའི་ཆེད་དུ་ཚེ་ཐར་ དུ་གཏོང་བ། སེམས་ཅན་ཐམས་བཅད་མ་རུ་མ་གྱུར་བ་མེད་པའི་འདུ་ཤེས་ཀྱི་སྙིང་རྗེ་ཡིས་ཚེ་ཐར་དུ་ གཏོང་བ། གཞན་གྱི་དཀའ་སྡུག་དང་མནར་གཅོད་མཐོང་མ་བཟོད་པར་ཚེ་ཐར་དུ་གཏོང་བ་སོགས་རིགས་ མང་པོ་ཡོད། སྒོ་ཕྱུགས་ཡིན་ན་ཟེ་ཁ་དང་རྔོག་མའི་ནང་དུ་བལ་དཀར་དང་དར་མཚོན་གྱི་སྲུང་རྟགས་ འདོགས་པ་དང་ཡང་ན་རྣ་དང་རྭ་རྩེ་སོགས་སུ་འདོགས། ཡི་དམ་སོགས་སུ་ཕུལ་བའི་ཚེ་ཐར་ཡིན་ན་མགོན་གཡག་གམ་སྲུང་གཡག་དང་།ལྷ་ལུག་སོགས་ སུ་འབོད། བསང་ཕུལ་ཏེ་སྲུང་རྟགས་འདོགས། ཚེ་ཐར་དུ་བཏང་བའི་ཉིན་དེ་ནས་བཟུང་བཙོང་ནས་རིན་མི་ལེན། བཤས་ནས་ཤ་མི་ཟ། བཟུང་ནས་བེད་མི་སྤྱོད་པའི་དམ་བཅའ་དང་བཅས་ཏེ་སྲུང་རྟགས་འདོགས་པ་དང་། ཁྲུས་ཆུ་དཀར་ནག་གིས་ཁྲུས་བྱེད་པ། སྐྱབས་གནས་དཀོན་མཆོག་གསུམ་དང་ལྷ་ཀླུ་གཉན་གསུམ་ལ་གཏན་ཉར་དང་བཅས་ཏེ་འདོགས་ཐག་ སོགས་ཡོངས་སུ་བླངས་ནས་རང་དབང་རྒྱ་ཡན་དུ་གཏོང་སྲོལ་ཡོད།

ཉིན་རེའི་ཟས་རིགས་ལས་སྣོན་བྱེད་སྟངས།

སྦྲ་ནག་བཟོ་སྟངས།

སྦྲ་ནག་ཅེས་པ་ནི་བོད་ཀྱི་གདོད་མའི་དུ ས་ཀྱི་སྡོད་གནས་ རིགས་ཤིག་ཡིན་ལ་བོད་བཙན་པོའི་སྐབས་ནས་བཟུང་དམག་གུར་གྱི་བྱེད་ནུས་ཡོངས་སུ་ ཚང་པར་བྱས་ཡོད། དེ་ལ་ཐུན་མོང་མ་ཡིན་པའི་ཁྱད་ཆོས་མང་པོ་ཞིག་ཡོད། སྦྲ་ནག་གི་རྒྱུ་ནི་མཚོ་ངོས་ལས་མཐོ་ཚད་རྨིད་བཞི་སྟོང་ལྷག་གི་མཐོ་སྒང་དུ་འཚོ་ གནས་བྱེད་ཐུབ་པའི་སྲོག་ཆགས་ཤིག་སྟེ། འཛམ་གླིང་གི་སྣེ་མོ་གསུམ་པ་བོད་ཁོ་ནར་མ་གཏོགས་མེད་པའི་ནོར་ནག་གི་རྩིད་ཁུལ་ ལས་སྣོན་བྱས་ཏེ་འཐག་པའི “རེ”ཞེས་པ་དེ་ཡིན་ལ། ནོར་རྩིད་ཀྱི་ལྗིད་ཚད་ཡང་མོ་ཡིན་པས་མཚེར་སོགས་སྤོར་བདེ་བ་དང་། ཆར་ཆུ་དང་འཕྲད་ན་རང་བཞིན་གྱིས་གྲིམ་པོར་གྱུར་ཏེ་སྲ་མཁྲེགས་སུ་འགྲོ་བའི་ནུས་ པ་ཡོད་པས་ཆུ་ཁོག་པ་དང་། ནོར་ཁུལ་གྱིས་ཧ་ཅང་གི་དྲོད་སྟེར་ཐུབ་པ་སོགས། མདོར་ན་ལྷགས་རླུང་དང་ཁ་ཆར་ཁོག་པ་དང་། ཉི་འོད་ཀྱི་དྲོད་ལེན་ཞིང་འཚེ་བ་འགོག་པ། ནང་དུ་སྒྱེད་པུའམ་ཐབ་ཀ་བཙུགས་ནས་མེ་བུས་ཆོག་པ། སྦྲ་ཆེན་ཡིན་ན་ཐབ་ཀ་གསུམ་བཞི་བང་རིམ་ལྟར་བཙུགས་ཆོག་ཅིང་ནང་དུ་མི་བརྒྱ་ཕྲག་ ཁ་ཤས་ཤོང་ཐུབ། རྒྱུན་ལྡན་གྱི་སྦྲ་ནང་དུ་ཐབ་ཀ་ཆེན་པོ་གཅིག་ལས་མེད་པ་དང་། ནང་མི་བཅུ་ཕྲག་མཉམ་སྡོད་བྱས་ཆོག མཚེར་སོགས་སྤོར་སྐབས་འཁྱེར་བདེ་བའི་ཁྱད་ཆོས་ཡོད་པར་མ་ཟད། བོད་མི་ཚོས་སྦྲ་ནག་གི་དབྱིབས་ནི་རུལ་སྦལ་ཞིག་དང་ཀུན་ནས་མཚུངས་པས་བོད་མིའི་ ངག་རྒྱུན་དུ་རུས་སྦལ་ནི་ས་དགྲའི་གནོད་པ་འགོག་བྱེད་ཅིག་ཏུ་བརྩི་བས་སྦྲ་ནག་ ཕུབ་ས་ནས་ས་དགྲ་མི་འབྱུང་ཟེར་སྲོལ་ཡོད་ཅིང་། གྲུ་བཞི་ནར་མོའི་དབྱིབས་ལ་ཆེ་ཆུང་ལྟར་ཆོན་ཐག་བཞིའམ་ཡང་ན་དེ་ལས་མང་པ་དང་། སྒོ་ཆོན་ཐོག་འོག་གཉིས་། ཕུག་ཆོན། དཀྱིལ་ཆོན། གྲུ་ཐིག སུམ་ཐིག ཁ་ཐིག ངོ་ཐིག ཟུང་ང་སོགས་ཡོད། གཞན་ཡང་གློ་བུར་བའི་འཇབ་རྒོལ་དང་། མཚེར་ས་སྤོར་བདེ་བའི་ཆེད་དུ་ཕོ་ཁྱིམ་མོ་ཁྱིམ་དུ་བཀར་ཏེ་དུམ་བུ་གཉིས་སུ་ གྲུབ་པར། ངོ་ཐིག་དང་ཟུང་ང་སོགས་ལ་ཆ་རུ་སྤྲད་ནས་སྟབས་བདེའི་རང་བཞིན་གྱི་ལྷུ་བསྒྲིགས་ བྱས་ཡོད། དེ་བཞིན་དུ་ཕོ་ཁྱིམ་མོ་ཁྱིམ་གྱི་དབྱེ་བ་ལྟར་ཕོ་ལུང་མོ་ལུང་ཞེས་པའི་ཟུང་ཐག་ གཉིས་ཀྱང་དམིགས་བསལ་གྱིས་བཏགས་ཡོད་པ་དང་། ལྷག་པར་དུ་ཕོ་ཡིན་ན་ཕོ་ཁྱིམ་དུ་སྡོད་པ་དང་མོ་ཡིན་ན་མོ་ཁྱིམ་དུ་བཟའ་བཏུང་ གཡོ་སྐོལ་བྱེད་ས་ཡིན། ས་གཞན་ནས་འོང་བའི་མགྲོནཔོ་ཞིག་ཡིནའང་ཕོ་ཡིན་ན་ཕོ་ཁྱིམ་དུ་སྡོད་པ་ལས་མོ་ ཁྱིམ་དུ་འདུག་སྲོལ་མེད། འདི་ནི་བོད་སྦྲ་ནག་ཅན་གྱི་དམིགས་བསལ་གྱི་ཁྱད་ཆོས་སམ་ཡབ་མེས་དུས་ནས་ཟམ་མ་ཆད་ པའི་གོམས་འདྲིས་དང་ཡང་ན་གནའ་སྲོལ་ཁྱད་པར་བ་ཞིག་ཡིན།

འཚེར་སྤོར་སྟངས།

མཛད་སྒོ་ཁག

རྟ་རྒྱུགས་དུས་ཆེན།

རྟ་རྒྱུག་དུས་ཆེན་ནི་བོད་མིས་ཧ་ཅང་དགའ་པོ་བྱེད་པའི་ དུས་ཆེན་ཞིག་ཡིན། དེའང་སྤྱི་ཚོགས་དང་ཐོན་སྐྱེད་འཕེལ་རྒྱས་བྱུང་བ་དང་འབྲེལ་བ་དམ་ཟབ་ཡོད་པ་ཞིག་ ཡིན། གང་ལགས་ཤེ་ན། སྐབས་དེར་བོད་མིའི་འགྲིམ་འགྲུལ་ཡོ་ཆས་གཙོ་བོ་ནི་རྟ་ཡིན་ཅིང་ཚང་མས་རྟ་ལ་ དྭངས་ཞེན་ཆེན་པོ་བྱེད་ཀྱི་ཡོད་ལ་རྟ་ནི་མི་ཚོའི་ཐོན་སྐྱེད་དང་འཚོ་བའི་ནང་ མེད་དུ་མི་རུང་བའི་དངོས་པོ་ཞིག་ཏུ་གྱུར་པ་རེད། དེར་བརྟེན་བོད་མིས་རྟ་ལ་མཐོང་ཧ་ཅང་ཆེན་པོ་བྱེད་ཀྱི་ཡོད། དཔེར་ན་མིང་གི་རྣམ་གྲངས་ལས་རྟ་ལ་ཅང་ཤེས་དང་། རྟ་མཆོག་རིན་པོ་ཆེ་སོགས་ཟེར་སྲོལ་ཡོད་ཁར་ཐ་ན་ཡི་དམ་གྱི་ནང་དུའང་རྟ་མགྲིན་ ཟེར་བ་ཡོད་པ་བཅས་ཀྱི་ཐོག་ནས་བོད་མིས་རྟ་ནི་སྒོ་ཕྱུགས་ཀྱི་ནང་ནས་གཙོ་ཆེ་ཤོས་ ཤིག་ལ་བརྩི་ཡི་ཡོད་པ་གསལ་རྟོགས་ཐུབ་པ་མ་ཟད། ད་དུང་སྔོན་བྱོན་མཁས་དབང་ཚོས་རྟ་ལ་དཔྱད་པའི་རྟ་དཔྱད་རྩོམ་འབྲི་གནང་ཡོད་པ་ ནི། དཔེར་ན་《རྟ་དཔྱད་མཐོང་བ་ཀུན་གསལ་མེ་ལོང་》ལས་“དེ་བཞིན་ཕྱོགས་རེར་ཡུལ་ལྔ་ནས། རྟ་མཁན་མཁས་པ་མི་དགུ་བསྡུས། དགུ་བོ་འདོད་ལུགས་སོ་སོར་བྱུང་། དགྱེ་བོ་འཇག་རྟ་རུ་རྔུ་གཉིས། སྒུར་པོ་གྱམ་ཤིང་མུ་ཆེན་གཉིས། དྲང་པོ་འདོ་བ་གྱི་ལིང་གཉིས།”ཞེས་འཁོད་པར་གཞིགས་ན། ཁྲི་སྲོང་གི་དུས་ནས་རྟའི་དབྱེ་བ་ཆེན་པོ་དྲུག་འབྱེད་སྲོལ་ཡོད། གོང་གསལ་གྱི་ཐོག་ནས་བོད་མིས་རྟ་ལ་འདུ་ཤེས་གཏིང་ཟབ་ཡོད་པ་མཐོང་ཐུབ་པ་ནི་རྟ་ རྒྱུག་དུས་ཆེན་གྱི་སྲོལ་དར་བ་ནི་སྤྱི་ཚོགས་ཀྱི་འཕེལ་རིམ་ཞིག་ཡིན་ལ་བསམ་ བློའི་རྨང་གཞི་ཡར་རྒྱས་ཀྱི་རྣམ་པ་ཞིག་ཀྱང་ཡིན། རྨང་གཞི་དེ་འདྲ་ཞིག་གི་ཐོག་བོད་ཡུལ་གྱི་ས་ཆ་མང་པོ་ཞིག་ལ་རྟ་རྒྱུག་གི་དུས་ ཆེན་དར་ཡོད་པ་རེད། སྔར་བཙན་པོའི་དུས་ནས་རྟ་ཐོག་སྤོ་ལོ་རྒྱག་སྲོལ་ཡོད་པ་བཅས་ཀྱི་ཐོག་ནས་བོད་ ཡུལ་དུ་རྟ་རྒྱུག་དུས་ཆེན་གྱི་སྲོལ་དེ་དར་ནས་དུས་ཡུན་ལོ་ངོ་སྟོང་ལྷག་ཕྱིན་ ཡོད་པ་ར་འཕྲོད་གསལ་པོ་ཐུབ་ཀྱི་རེད། ཡུལ་ལུང་སོ་སོའི་རྟ་རྒྱུག་གི་ནང་དོན་ཐད་རྩ་བའི་ཆ་ནས་འདྲ་མཚུངས་ཡིན། གཅིག་ནས་“རྒྱུག་ཆེན་”ཞེས་མགྱོགས་ཚད་འགྲན་བསྡུར་བྱས་ནས་མགྱོགས་ཚད་ཀྱི་ཨང་ཀི་ བཟོས་ཏེ་རིམ་པ་མཐོ་དམའ་ལ་གཞིགས་པའི་བྱ་དགའ་སྤྲོད་ཀྱི་ཡོད། འགྲན་བསྡུར་ནང་ཞུགས་མཁན་མང་ཆེ་བ་ལྗིད་ཚད་ཡང་བར་བལྟས་ནས་བྱིས་པ་ལོ་བཅུ་ལྷག་ ཙམ་ཀྱང་ཡོད། རྟ་རྒྱུག་འགྲན་བསྡུར་གཏོང་སྐབས་རྟ་པ་ཚོས་མི་རིགས་ཀྱི་ཁྱད་ཆོས་ལྡན་པའི་རྒྱན་ གོས་གང་ལེགས་གྱོན་དགོས་པའི་ཁར་རྟ་ལའང་རྟ་ཆས་དང་མཛེས་རྒྱན་གང་ལེགས་སྤྲས་ཏེ་ དེ་ཉིན་ནི་རྟའི་བཟང་ངན་དང་། མིའི་སྐྱ་རྩལ། མཛེས་ཆོས་རྒྱན་གོས་སོགས་ཀྱི་འགྲན་རྩོད་ཞིག་ཀྱང་ཡིན། གཉིས་ནས་“འགྲོས་བསྡུར་”ཞེས་རྟ་འགྲོས་མའི་མགྱོགས་ཚད་དང་། འགྲོས་ཡག་ཚད་བསྡུར་གྱི་ཡོད་ཅིང་། འགྲོས་ནི་རྟའི་ཆ་རྐྱེན་གཙོ་བོ་ཞིག་ལ་བརྩི་ཡི་ཡོད་པ་རེད། འགྲོས་བསྡུར་ལའང་མགྱོགས་ཚད་ལ་བལྟ་བ་མ་ཟད། ད་དུང་རྟས་གོམ་པ་རྒྱག་དུས་ལག་པ་མཐོ་དམའ་དང་འགྲོས་བདེ་མིན་སོགས་ཀྱི་ཆ་རྐྱེན་ ལ་གཞིགས་སྟེ་རིམ་པ་དབྱེ་ནས་བྱ་དགའ་སྤྲོད་སྲོལ་ཡོད་པ་རེད། གསུམ་ནས་“ཞར་འཕེན་”ཞེས་རྟ་ཐོག་ནས་མདའ་དང་མེ་མདའ་འཕེན་པའི་རྩལ་འགྲན་ནས་འབེན་ ལ་ཕོག་ཐུབ་མཁན་ལ་བྱ་དགའ་རིམ་པ་སྤྲོད་སྲོལ་ཡོད། ལྟད་མོ་དེར་རྒྱ་ཆེའི་མང་ཚོགས་ཚོས་དགའ་ཤོས་བྱེད་ཀྱི་ཡོད། བཞི་ནས་རྟ་ཐོག་ནས་ཁ་བཏགས་སྒྲུག་པའི་རྟ་རྩལ་འགྲན་བསྡུར་བྱེད་ཀྱི་ཡོད། རྟ་རྒྱུག་ལམ་དུ་ཁ་བཏགས་མང་པོ་བཀྲམ་ཏེ་རྟ་རྒྱུག་བཞིན་རྟ་ཐོག་ནས་ཁ་བཏགས་ཡར་ སྒྲུག་དགོས་ཀྱི་ཡོད། ཁ་བཏགས་སྒྲུག་སྐབས་རྟ་མགྱོགས་པོ་གཏོང་དགོས་ལ་ཁ་བཏགས་གང་མང་སྒྲུག་དགོས། རྟ་རྒྱུག་པའི་མགྱོགས་ཚད་དང་ཁ་བཏགས་སྒྲུག་པའི་མང་ཉུང་ལ་གཞིགས་སྟེ་བྱ་དགའ་ རིམ་པ་བཟོས་ནས་སྤྲོད་སྲོལ་ཡོད།

ལོ་གསར།

བོད་མིའི་ལོ་གསར་གྱི་འབྱུང་བ་རོབ་ཙམ་ཞུས་ན་གནམ་ལོ་ གསར་བཞད་ནི་བོད་རྒྱལ་དགུ་པ་པུ་དེ་གུང་རྒྱལ་གྱི་དུས་རྒན་མོ་བལ་མའི་ཟླ་རྩིས་ ཞེས་པ་ཟླ་བའི་དཀར་ཆའི་འཕེལ་གྲིབ་དང་། རྒྱུ་སྐར་གྱི་འཁོར་བགྲོད་ལ་བརྟེན་ནས་དུས་བཞི་དབྱེ་བ་དང་། ཟླ་ཚེས་བརྩིས་ཏེ་ལོ་འཁོར་མཚམས་ཀྱི་དུས་རྟགས་དེ། ལྷོ་ཁ་ཡར་ལྷ་ཤམ་པོའི་འདབས་ཀྱི་ཁམ་སྡོང་ལ་མེ་ཏོག་ཤར་འཕྲལ། དཔྱིད་ཀྱི་དུས་ཆེན་གཏོང་སྲོལ་ཆགས་པ་དང་། དེ་ནས་བོད་ཀྱི་ལོ་གསར་ཐོག་མ་གཏོང་འགོ་ཚུགས་པ་རེད་ཟེར་སྲོལ་འདུག འོན་ཀྱང་བོད་ཀྱི་ལོ་གསར་དེ་ཡང་ཡུལ་ལུང་སོ་སོའི་ཡུལ་སྲོལ་གོམས་གཤིས་དང་། སོ་ནམ་བྱ་ལས་ཀྱི་དུས་ཚོད་མི་འདྲ་བའི་དབང་གིས་མི་འདྲ་ས་མང་ཙམ་ཡོད། དཔེར་ན། ཀོང་པོ་ཁུལ་དུ་བོད་ཟླ་བཅུ་པའི་ཚེས་གཅིག་ཉིན་ལོ་གསར་གཏོང་བ་དང་། སྟོད་མངའ་རིས་སྦུ་ཧྲེང་རྫོང་སོགས་ལ་བོད་ཟླ་བཅུ་གཅིག་པར་ལོ་གསར་གཏོང་བ། དབུས་གཙང་གི་ས་ཁུལ་མང་པོ་ཞིག་ལ་སོ་ནམ་ལོ་གསར་ཞེས་བོད་ཟླ་བཅུ་གཉིས་པའི་ཚེ་ གཅིག་ལ་ལོ་གསར་གཏོང་བ་སོགས་བོད་མིའི་ལོ་གསར་གཏོང་དུས་གཅིག་གྱུར་ཞིག་མེད་ ཅིང་། བོད་མིའི་ལོ་གསར་གཙོ་བོ་ནི་ཧོར་ཟླ་དང་པོའི་ཚེས་གཅིག་ཉིན་གཏོང་གི་ཡོད། ཤོད་སྲོལ་ལ་ཧོར་ཟླ་དང་པོའི་ཚེས་གཅིག་ལ་བླ་མ་ལོ་གསར་དང་། ཚེས་གཉིས་ལ་རྒྱལ་པོ་ལོ་གསར། ཚེས་གསུམ་ལ་གཟབ་གསོལ་གྲོས་སྟོན་བཅས་ཟེར་ཞིང་། ཆེས་ཁྱབ་ཆེ་བའི་མང་ཚོགས་ཁྲོད་དུ་ལོ་གསར་གྱི་སྔ་ནུབ་ཏུ་ལོ་གསར་གྱི་གྲ་འགྲིག་ གི་ལས་ཀ་སྟེ། གྲོ་སོ་ཕྱེ་མར་དང་། གྲོ་མ་འབྲས་སིལ། ལོ་ཕུད། ཆང་ཕུད། ཁ་ཟས་ཁུར་ཁོག ཉ་ཤག སྨུག་ཐུང་། སྦོ་ལུག པིན་ཏོག མར་སྲེག་བཅས་ཁ་ཟས་ཀྱི་སྡེར་ཁ་དང་། ཤིང་འབྲས་སྣ་ཚོགས་བླུགས་པའི་སྡེར་མ། མར་མཚོན་ལས་ཉི་ཟླའི་གཟུགས་དབྱིབས་ཀྱིས་བཙུགས་ཏུ་རྒྱན་པའི་ལུག་མགོ་ཇ་སྦག་ དང་། མར་གྲོད་རིལ། མར་གྱི་གཡུང་དྲུང་རི་མོས་རྒྱན་པའི་ཞིབ་ཐུད་གྲུ་བཞི། དེ་མིན་ས་ཁུལ་སོ་སོའི་ཐོན་དངོས་བཟའ་ཆའི་རིགས་འདྲ་མིན་སྣ་ཚོགས་རང་རང་གི་ འཁོས་དཔག་ལ་གཞིགས་ཏེ་མཆོད་གཤོམ་གྱི་མདུན་ནམ་ཡང་ན་ཆ་སྒམ་སྟེང་སྒྲིག་གཤོམ་ བྱེད་པའི་ལས་བྲེལ་ཆེན་པོ་ཡོད། གཞན་ཡང་དག་སྣང་ཆེན་པོས་ཚོགས་ཕུད་དང་། མཆོད་ཡོན་སྣེ་ལྔ་ལ་སོགས་པ་སྒྲིག་སྲོལ་ཡོད། དེ་མིན་ཁང་པའི་གདུང་མ་དང་། སྒོ་སྒེའུ་ཁུང་ལ་ཤམ་བུ་དང་སྒོ་ཡོལ། ཁ་གདན་སོགས་གསར་པ་རྒྱག་པ། ཐབ་ཚང་གི་རྩིག་ལྡེབས་སུ་དུ་དྲེག་ཡོད་པར་གྲོ་ཞིབ་ཀྱི་དཀར་རྟགས་བཀྲ་ཤིས་རྟགས་ བརྒྱད་ལ་སོགས་པ་བཀྲ་ཤིས་པའི་རི་མོ་དང་། ཐབ་ཀྱི་ཐོད་དུ་ཀླུ་མོ་མཚོན་བྱེད་སྡིག་རའི་གཟུགས་སོགས་འགོད་པ། ཕྱི་སྒོའི་མདུན་ས་དཀར་གྱི་གཡུང་དྲུང་ངམ་ཡང་ན་བཀྲ་ཤིས་པའི་རི་མོ་སྣ་ཚོགས་ ཀྱི་དཀར་ཐིག་འཐེན་པ། ཐོག་སྟེང་དུ་འཛུགས་རྒྱུའི་དར་ལྕོག་གྲ་སྒྲིག་བྱེད་པ་སོགས་མདོར་ན་རྟེན་འབྲེལ་ གྱི་བྱེད་སྒོ་རྣམས་ངེས་པར་ཚགས་སུ་ཚུད་པ། ཚེས་གཅིག་གི་ཞོགས་པ་སྔ་ལངས་ཐོག་རྒན་གཞོན་ཚང་མས་རྒྱན་གོས་གཟབ་མཆོར་གྱིས་ བརྒྱན་ཏེ་སྔོན་ལ་ཆུ་ཕུད་ལེན་པ་དང་།ཐོག་བསང་འབུལ་བ། དགོན་པར་ཕྱིན་ནས་རྟེན་མཆོག་རྣམས་ཀྱི་སྤྱན་སྔར་མཆོད་མཇལ་ཞུ་བ། རང་ཁྱིམ་དུ་གསོལ་ཇ་བསྲུབས་མ་དང་། གྲོ་འབྲས། ཕྱེ་མར། ཆང་ཕུད། གྲོ་ཐུག ཆང་སྐོལ། དཀར་སྤྲོ་སོགས་རོ་བཅུད་ལྡན་པའི་ཟས་བཟང་ལ་ཅི་འདོད་ལྟར་ལོངས་སུ་སྤྱོད་པ་དང་ ཕན་ཚུན་ཞི་འདུལ་འཛུམ་མདངས་ཀྱི་རྣམ་འགྱུར་བཅངས་ཏེ་གྲོང་ཁྱིམ་ཕན་ཚུན་ཕྱེ་མར་ རྒྱུགས་པར་འགྲོ་ཞིང་། གཏམ་གྱི་ཐོག་མར་ཚང་མས་བཀྲ་ཤིས་བདེ་ལེགས་ཕུན་སུམ་ཚོགས། ཨེ་མ་བག་དྲོ་སྐུ་ཁམས་བཟང་། ཞེས་ཤིས་ཚིག་བརྗོད་པ་དང་སྦྲགས་ཕྱེ་མར་དང་། ཆང་ཕུད་འདེགས་རེས་བྱེད་ཅིང་། དེ་ཉིན་རང་ཁྱིམ་སོ་སོར་སྤྲོ་སྐྱིད་བྱེད་པ་ལས་ཕན་ཚུན་མགྲོན་སྐྱོད་བྱེད་སྲོལ་ མེད་ལ་ཁ་རྩོད་རྒྱག་པ་སོགས་ཚུལ་མིན་གྱི་བྱ་སྤྱོད་ཚིག་ངན་གང་ཅིར་འཛེམས་ཆ་ བྱེད་པ་བཅས་སྲོལ་བཟང་དེ་དག་ལག་ལེན་བསྟར་དགོས། ཚེས་གཉིས་གསུམ་ནས་བཟུང་གཉེན་ཉེ་དང་། གྲོགས་པོ། དཀར་ཉེ་སོགས་ཕན་ཚུན་མགྲོན་སྐྱོད་འགྲོ་འོང་གི་བྱེད་སྒོ་འགོ་ཚུགས་ཤིང་། ད་དུང་གྲོང་གསེབ་ཁག་ལ་ལོ་གསར་ཧ་ཅང་འཁྲུག་པོ་ཡོད། གྲོང་ཚོ་ཁག་མཉམ་འཛོམས་ཐོག་སྒོར་གཞས་རྒྱག་པ་དང་། རྡོ་སྐོར་འཕེན་པ་སོགས་རིག་རྩལ་གྱི་བྱེད་སྒོ་ཁག་གཟབ་པར་སྤེལ་ནས་ལོ་གསར་དགའ་ སྤྲོའི་ངང་གཏོང་གི་ཡོད། བོད་མིས་ལོ་གསར་གཏོང་བའི་དུས་ཚོད་ཀྱང་ཅུང་རིང་ཙམ་ཡིན། ལུང་པ་མང་ཆེ་བས་ལོ་གསར་ཚེས་གཅིག་ནས་བཅོ་ལྔ་བར་གཏོང་སྲོལ་ཡོད།

རླུང་རྟ།

བཀྲ་ཤིས་རྟགས་བརྒྱད་མཚོན་དོན།

བཀྲ་ཤིས་པའི་མཚོན་བྱེད་རྟགས་བརྒྱད་ཀྱི་རི་མོའི་མཚོན་ཚུལ་མདོ་ཙམ་བརྗོད་པར་ བྱ་བ་ལ་སྤྱིར་དེ་དག་སོ་སོའི་སྐབས་སུ་བབས་པའི་མཚོན་བྱ་འདི་དང་འདི་ན་འོ་ཞེས་ སྨྲ་བར་མི་ནུས་ཀྱང་།ད་ལམ་གཡང་སྐྱབས་ནོར་བུ་ཆ་བདུན་གྱི་གཡང་རྫས་འགྲེལ་བཤད་ ནང་གསུངས་པ་ལྟར་ན། ༡.འཁོར་ལོ་ནི།བརྗོད་བྱ་སྡེ་སྣོད་གསུམ་དང་།རྗོད་བྱེད་བསླབ་པ་གསུམ་གདུལ་བྱའི་ རྒྱུད་ལ་འཕོ་བར་བྱེད་པའི་ཆོས་ཀྱི་འཁོར་ལོའི་མཚོན་ཚུལ་ཡིན། ༢.གདུགས་ནི།འགྲོ་བའི་ཉོན་མོངས་པའི་ཚ་གདུང་སེལ་བར་བྱེད་པའོ། ༣.རྒྱལ་མཚན་ནི།ཕ་རོལ་བདུད་དང་མུ་སྟེགས་ཕམ་པར་བྱས་ཏེ།མཚན་དང་དཔེ་བྱད་ཀྱི་ ཡོན་ཏན་ཡོངས་སུ་རྫོགས་པར་མཚོན་པའོ། ༤.དཔལ་བེའུ།?པ་ཊ་?ནི།ཡོན་ཏན་ཐམས་ཅད་རབ་ཏུ་རྫོགས་ཤིང་། ཡེ་ཤེས་ལྔ་ཡི་དཔལ་དང་ལྡན་པའོ། ༥.དུང་དཀར་གཡས་འཁྱིལ་ནི།སྙན་པ་དམ་པའི་ཆོས་ཀྱི་སྒྲ་སྒྲོགས་པའི་ཚངས་པའི་གསུང་ དབྱངས་མཚོན་པའོ། ༦.བུམ་པ་ནི།ཡོན་ཏན་བཅུད་ཀྱིས་རབ་ཏུ་གང་ཞིག་རྣམ་དཀར་བསོད་ནམས་ཀྱི་རྟེན་བྱེད་ པ་མཚོན་པའོ། ༧.པདྨ་ནི།སྲིད་པར་གནས་ཀྱང་སྲིད་པར་མ་ཆཊ་པར་ལས་ཉོན་གྱི་དྲི་མས་མ་གོས་པ་མཚོན་ པའོ། ༨.གསེར་ཉ་ནི།གཡང་རྣམས་ཉེས་པའི་སྐྱོན་སྤངས་པར་བྱེད་པའི་མཚོན་ཚུལ་ཡིན་པ་བཅས་ གསུངས་འདུག གཞན་ཡང་འཕཊ་པ་བཀྲ་ཤིས་བརྩེགས་པ་ཞེས་བྱ་བ་ཐེག་པ་ཆེན་པོའི་མདོ་ལས།ན་མོ་དབུ་ལ་ བཀྲ་ཤིས་གདུཊ་ལྟར་སྐྱོབས། སྐུ་ལ་བཀྲ་ཤིས་མི་ནུབ་རྒྱལ་མཚན་མཆོག གསུང་ལ་བཀྲ་ཤིས་ཆོས་དུང་གཡས་སུ་འཁྱིལ།ཐུགས་ལ་བཀྲ་ཤིས་དཔལ་གྱི་བེ་འུ་གསལ། སྤྱན་ལ་བཀྲ་ཤིས་རིན་ཆེན་གསེར་གྱི་ཉ། ལྗགས་ལ་བཀྲ་ཤིས་པད་མོ་ལོ་འདབ་རྒྱས།མགུལ་ལ་བཀྲ་ཤིས་རིན་ཆེན་བུམ་པ་འཁྱིལ། ཕྱག་ལ་བཀྲ་ཤིས་ཡོན་ཏན་ནོར་བུ་མཆོག ཞབས་ལ་བཀྲ་ཤིས་འཕྲིན་ལས་འཁོར་ལོ་ལྔ། བཀྲ་ཤིས་རྫས་བརྒྱད་དངོས་གྲུབ་དམ་པའི་མཆོག རྫས་མཆོག་བརྒྱད་ཀྱི་བཀྲ་ཤིས་གང་ཡིན་པ། དེང་འདིར་བདག་ཅག་རྣམས་ལ་བཀྲ་ཤིས་ཤོག བཀྲ་ཤིས་དེས་ཀྱང་རྟག་ཏུ་བདེ་ལེགས་ཤོག་ཅེས་གསུངས་པ་སོགས་འགྲེལ་བཤད་མཚོན་ཚུལ་ རྒྱས་བསྡུས་ཅི་རིགས་མཆིས་ཀྱང་འདིར་དེ་ཙམ་གྱིས་མཚོན་པར་བགྱིས་པ་ལགས་སོ།