དབུ་མའི་ལམ་གྱི་བྱུང་རབས།

ཕྱི་ ལོ་1951ལོར་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་བོད་གཞུང་དབར་བཞག་པའི་ གྲོས་མཐུན་དོན་ཚན་17དེ་ནི་འདྲ་མཉམ་གཉིས་མོས་ཐོག་བཞག་པ་ཞིག་མིན་ཡང་། ༧གོང་ས་༧སྐྱབས་མགོན་ཆེན་པོ་མཆོག་གིས་བོད་རྒྱ་མི་རིགས་གཉིས་ཀའི་ཁེ་ཕན་ཆེད་ ཕྱི་ལོ1959བར་ལོ་བརྒྱད་རིང་རྒྱ་ནག་གཞུང་དང་མཉམ་དུ་འགྲིག་མཐུན་ཡོང་བའི་ཐབས་ ཤེས་ཡོད་དགུ་རྩལ་སྤྲུག་གནང་སྟེ། ཐ་ན་1959ལོར་༧གོང་ས་༧སྐྱབས་མགོན་ཆེན་པོ་དང་བཀའ་ཤག་བཅས་ལྷ་ལྡན་ནས་ལྷོ་ཁར་༧ ཞབས་སོར་འཁོད་རྗེས་སུའང་རྒྱ་དམར་དམག་དཔོན་ཁག་དང་མུ་མཐུད་གྲོས་མོལ་འགྲིག་ ཆགས་ཡོངས་ཐབས་གནང་ཡོད། གྲོས་མཐུན་དོན་ཚན་17གྱི་འབྲུ་དོན་ལྟར་གནས་ཐབས་གནང་བའང་དབུ་མའི་ལམ་དང་མཚུངས་ པ་ཞིག་ཡིན། འོན་ཀྱང་བློ་ཕམ་པ་ཞིག་ལ་རྒྱལ་ས་ལྷ་སར་རྒྱ་དམག་གིས་དྲག་གནོན་ཚད་མེད་བྱས་ སྟབས་རྒྱ་ནག་གཞུང་དང་མཉམ་གནས་གནང་རེ་བྲལ་བའི་དངོས་ར་འཕྲོད་དེ་བོད་མི་མང་གི་ རང་དབང་དང་བདེ་སྐྱིད་སླར་གསོའི་སླད་རྒྱ་གར་དུ་བཙན་བྱོལ་ལ་མ་ཕེབས་ཐབས་མེད་ བྱུང་། ཕྱི་1959ཕྱི་ཟླ4ཚེས18ཉིན་རྒྱ་གར་ས་ཁུལ་ཏེཛ་པུར་དུ་༧ཞབས་སོར་འཁོད་མ་ཐག་༧གོང་ ས་མཆོག་གིས། གྲོས་མཐུན་དོན་ཚན་17ནི་བཙན་འོག་ཏུ་བཞག་པ་དང་། རྒྱ་ནག་གཞུང་གིས་གྲོས་མཐུན་གྱི་འབྲུ་དོན་ཁག་བསམ་བཞིན་བརྡལ་བཤིག་བཏང་བའི་ རྒྱུ་མཚན་གཉིས་ལ་བརྟེན་ནས་དེ་རིང་ནས་རྩིས་མེད་བཏང་སྟེ། བོད་རང་བཙན་བསྐྱར་གསོའི་ལས་འགུལ་དབུ་འཛུགས་གནང་རྒྱུ་ཡིན་ཞེས་གསལ་བསྒྲགས་ བསྐྱངས་པ་ནས་1979བར་བཙན་བྱོལ་བོད་གཞུང་མང་ཡོངས་ཀྱིས་བོད་རང་བཙན་བསྐྱར་གསོ་ གནང་རྒྱུའི་སྲིད་བྱུས་བཟུང་ཡོད། འོན་ཀྱང་སྤྱིར་འཛམ་གླིང་འདི་དཔལ་འབྱོར་དང་། ཆབ་སྲིད། དམག་དོན་གང་གི་ཆ ནས་གཅིག་ལ་བརྟེན་གྱི་དགོས་མཁོ་ཇེ་ཆེར་སོང་སྟེ། མི་རིགས་དང་ཡུལ་ལུང་ཟུར་གནས་དང་བཙན་གྱི་གནས་སྟངས་ལ་འགྱུར་བ་འགྲོ་ངེས་ཀྱིས་ བོད་རྒྱ་ཞི་མོལ་གྱི་དུས་སྐབས་ཤིག་ཡོང་རྒྱུར་གཟིགས་ཏེ། ༧གོང་ས་༧སྐྱབས་མགོན་ཆེན་པོ་མཆོག་གིས་བོད་དོན་ཞི་མོལ་གྱི་སྒོ་ནས་ཐག་གཅོད་ ཡོང་ཐབས་སུ་བོད་རང་བཙན་བསྐྱར་གསོ་བྱ་རྒྱུའི་སྲིད་བྱུས་ལ་འགྱུར་བ་གནང་སྟེ་ བོད་རྒྱ་གཉིས་སྨན་གྱི་ཐབས་ལམ་ཞིག་འཚོལ་སྒྲུབ་གནང་ན་དགེ་ཕན་ཆེ་བ་དུས་ཡུན་ རིང་པོ་ནས་དགོངས་བཞེས་གནང་ཡོད། དབུ་མའི་ལམ་ནི་གློ་བུར་དུ་བྱུང་བ་ཞིག་མིན། ༧གོང་ས་༧སྐྱབས་མགོན་ཆེན་པོ་མཆོག་གིས་ཐབས་ལམ་འདི་སྔ་མོ་ནས་དགོངས་པར་འཁོར་ ཡོད་ཀྱང་། དེ་འཕྲད་བརྒྱ་ཁ་གཅིག་གཅོད་ཀྱིས་ཐག་གཅོད་དང་། གཞན་ལ་བཙན་འགེལ་མ་གནང་བར་ལོ་རབས་བདུན་ཅུ་པའི་འགོ་སྟོད་ཙམ་ནས་བོད་མི་མང་ སྤྱི་འཐུས་ལྷན་ཚོགས་ཀྱི་ཚོགས་གཙོ་གཞོན་དང་། བཀའ་ཤག འབྲེལ་ཆགས་མཁྱེན་རྒྱ་ཡངས་པའི་ཤེས་མྱོང་ཅན་མང་པོར་བཀའ་བསྡུར་དང་། དགོངས་འཆར་བསྡུ་བཞེས་རིམ་པར་གནང་ཡོད་པ་ལྟར། ཕྱི་ལོ1979ལོར་སྐབས་དེའི་རྒྱ་དམར་གྱི་དབུ་ཁྲིད་སྐུ་གཤེགས་ཏེང་ཞའོ་ཕིང་གིས་༧ གོང་ས་༧སྐྱབས་མགོན་ཆེན་པོ་མཆོག་ནས་བོད་རང་བཙན་རྩོད་གླེང་མ་གནང་ན། དེ་མིན་གྱི་གནད་དོན་ཐམས་ཅད་གྲོས་མོལ་གྱི་ལམ་ནས་ཐག་གཅོད་གནང་ཆོག་ཅེས་དོན་ སྙིང་ལྡན་པའི་གྲོས་འགོ་བཏོན་སྐབས་༧གོང་ས་༧སྐྱབས་མགོན་ཆེན་པོས་དེ་སྔོན་ནས་ དུས་ཡུན་གང་འཚམས་རིང་ཕན་ཚུན་གཉིས་སྨན་གྱི་དགོངས་བཞེས་གནང་བཞིན་པ་དང་གཅིག་ མཐུན་ལྟ་བུ་བྱུང་སྟབས།༧གོང་ས་མཆོག་གིས་དེ་འཕྲལ་མཐུན་ཕྱོགས་ཀྱི་བརྡ་ལན་གནང་ སྟེ་བོད་རྒྱ་ཞི་མོལ་གནང་རྒྱུ་མོས་མཐུན་དང་། བོད་རང་བཙན་བསྐྱར་གསོའི་སྲིད་བྱུས་ནས་དབུ་མའི་ལམ་གྱི་སྲིད་བྱུས་སུ་འགྱུར་བ་ གཏོང་རྒྱུའི་ཐག་གཅོད་མཛད་ཡོད། དེ་ཡང་སྐབས་དེའི་བོད་མི་མང་སྤྱི་འཐུས་ལྷན་ཚོགས་དང་། བཀའ་ཤག མཁྱེན་རྒྱ་ཡངས་པའི་མི་སྣ་བཅས་པར་བཀའ་བསྡུར་གནང་འོས་གནང་སྟེ། བབ་ལྷིང་བརྟན་གསུམ་གྱི་དགོངས་པ་གཏིང་ཟབ་བཞེས་ནས་ཐག་གཅོད་གནང་བ་ཞིག་ལས་གློ་ བུར་དུ་བྱུང་བ་ཞིག་དང་། ཡང་ན་༧གོང་ས་ཆེན་པོ་རྐུ་རྐྱང་གིས་ཐུགས་ཐག་བཅད་དེ་གཞུང་དང་། མི་མང་ལ་བཙན་འགེལ་གནང་བ་མིན་པར་ཞིབ་ཕྲའི་བྱུང་རབས་ངེས་ཅན་ཡོད་པ་ཞིག་ཡིན།། དབུ་མའི་ལམ་ནི་མང་གཙོའི་ལམ་སྲོལ་ཐོག་ནས་གཏན་ལ་ཕབ་པའི་སྲིད་བྱུས་ཤིག་ཡིན ༧གོང་ས་མཆོག་གིས་བོད་རང་བཙན་བསྐྱར་གསོ་ནས་དབུ་མའི་ལམ་གྱི་སྲིད་བྱུས་ཐོག་ ཕེབས་རྒྱུའི་ཐག་གཅོད་མཛད་རྗེས་བོད་རྒྱ་ཞི་མོལ་གྱི་གཞི་རྩར་རང་སྲིད་རང་ སྐྱོང་གི་གནས་བབ་གང་འདྲ་ཞིག་དགོས་པའི་གྲོས་འཆར་ཕྱི་ལོ་༡༩༨༨་ཕྱི་ཟླ་༦་ཚེས་ ༡༥་ཉིན་སི་ཏྲས་སི་སྦབ་ཏུ་ཡུ་རོབ་གྲོས་ཚོགས་སུ་གསལ་བསྒྲགས་མ་གནང་གོང་། བཞུགས་སྒར་རྡ་རམ་ས་ལར་ཕྱི་ཟླ ༦ ཚེས ༦ ནས་ཉིན་བཞིའི་རིང་བོད་མི་མང་སྤྱི་འཐུས་རྣམ་པ་དང་། བཀའ་བློན་རྣམ་པ། གཞུང་ཞབས ། བོད་མིའི་སྡོད་སྒར་ཡོངས་རྫོགས་ཀྱི་ས་གནས་འགོ་འཛིན་དང་མི་མང་འཐུས་མི། གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ། བོད་ནས་གསར་དུ་འབྱོར་བའི་འཐུབ་མི། དམིགས་བསལ་མགྲོན་འབོད་གནང་བའི་མི་སྣ་བཅས་ཡོད་པའི་དམིགས་བསལ་ཚོགས་ཆེན་བསྡུ་ བསྐོང་ཐོག་གོ་བསྡུར་སྦྱང་བཤད་གནང་མཐར་ཚང་མས་གོང་གསལ་གྲོས་འཆར་ལ་མོས་མཐུན་ རྒྱབ་སྐྱོར་ཞུས་ཡོད། གྲོས་འཆར་བཏོན་ནས་དུས་ཡུན་ལོ་ཤས་ཕྱིན་ཡང་རྒྱ་གཞུང་ནས་བཟང་ཕྱོགས་ཀྱི་བརྡ་ལན་ མ་བྱུང་བར་བརྟེན་སླར་ཡང་ཕྱི་ལོ་༡༩༩༦དང་༡༩༩༧ལོར་༧གོང་ས་༧སྐྱབས་མགོན་ཆེན་པོ་ མཆོག་གིས་བོད་ཀྱི་རྩ་དོན་སྒྲུབ་ཕྱོགས་ཀྱི་ཐབས་ལམ་གང་ལེགས་བོད་རྒྱ་ཆེའི་མི་ མང་གིས་མང་མོས་ཐག་གཅོད་འོས་བསྡུའི་ལམ་ནས་ཐག་གཅོད་དགོས་པའི་ལམ་སྟོན་ཕེབས་པ་ བཞིན་སྔོན་འགྲོའི་བསམ་ཤོག་བསྡུ་ལེན་སྐབས་བསམ་ཤོག་བརྒྱ་ཆ་ ༦༤ བརྒལ་བས་མང་མོས་ཐག་གཅོད་འོས་བསྡུ་མ་དགོས་པར་དབུ་མའི་ལམ་དང་། ཡང་ན་རྒྱལ་སྤྱི་དང་རྒྱ་ནག་གི་ཆབ་སྲིད་ཀྱི་འགྱུར་འགྲོས་དང་བསྟུན། དུས་ནས་དུས་སུ་༧གོས་ས་མཆོག་གིས་ཐག་གཅོད་གང་གནང་ལ་རྒྱབ་སྐྱོར་ཞུ་རྒྱུ་ཡིན་ ཞེས་གསལ་བ་ལྟར། དེ་དོན་བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་༡༩༩༧ཕྱི་ཟླ༩ཚེས་༡༨་ཉིན་ སྤྱི་མོས་གྲོས་ཆོད་ཀྱི་ལམ་ནས་སྙན་གསན་ཞུས་པར། ༧གོང་ས་༧སྐྱབས་མགོན་ཆེན་པོ་མཆོག་གིས་ཕྱི་ལོ ༡༩༩༨ ཀྱི་གསུམ་བཅུའི་གསུང་འཕྲིན་ནང་། ང་ཚོའི་འཐབ་རྩོད་ཀྱི་ལམ་ཕྱོགས་འགྱོད་པ་མེད་པ་ཞིག་ཡོང་ཐབས་སུ་ངོས་ནས་མང་མོས་ འོས་བསྡུ་བྱ་རྒྱུའི་བསམ་འཆར་བཏོན་པ་དེའི་སྐོར་ན་ནིང་བཙན་བྱོལ་དུ་ཡོད་པའི་ བོད་མི་དང་། དེ་བཞིན་བོད་ནང་གི་མི་མང་གི་བསམ་འཆར་གང་ཐུབ་བསྡུ་ལེན་བྱས་པ་དང་། ཁོང་ཚོའི་བསམ་འཆར་ཇི་ལྟར་བྱུ་བའི་ནང་ནས་མང་མོས་གཞི་རྩར་བཞག་སྟེ་བོད་མི་མང་ སྤྱི་འཐུས་གྲོས་ཚོགས་ཀྱི་ཐོག་ནས་གྲོས་ཆོད་བཞག་པ་དེའི་ནང་མང་མོས་འོས་བསྡུ་ ཐོག་ནས་ཐག་གཅོད་བྱ་རྒྱུ་ཕྱིར་འཐེན་ཡོང་བ་དང་། ངོས་ནས་གང་དགེའི་ཐག་གཅོད་བྱེད་དགོས་ཞེས་འཁོད་འདུག མི་མང་ནས་ངོས་ལ་རེ་བ་དང་། ཡིད་ཆེས་བློས་འགེལ་དེ་ལྟ་བུ་བྱས་པ་ལ་ཐུགས་རྗེ་ཆེ་བརྗོད་རྒྱུ་ཡིན། བོད་དོན་དཀའ་རྙོག་སེལ་ཐབས་སུ་དབུ་མའི་ལམ་འདི་དངོས་ཡོད་གནས་ཚུལ་དང་མཐུན་ ཞིང་། ལག་ལེན་འཁེལ་ཐུབ་པ་ཞིན་ཡིན་པར་ངོས་ནས་ངོས་འཛིན་བྱེད་ཀྱི་ཡོད། ལམ་ཕྱོགས་འདིའི་ཐོག་ནས་བོད་མི་རིགས་ལ་མེད་དུ་མི་རུང་བའི་ཐོབ་ཐང་ཁག་ཡོང་བ་ དང་། རྒྱ་ནག་གིས་གལ་ཆེར་ལྟ་བའི་གཅིག་གྱུར་དང་བརྟན་ལྷིང་ལའང་ཕན་ཐོགས་ཡོང་ངེས་ཡིན་ པར་བརྟེན། ངོས་ནས་ལམ་ཕྱོགས་འདིའི་ཐོག་ནས་མུ་མཐུད་རྒྱ་ནག་གི་འགོ་ཁྲིད་ཚོར་འབྲེལ་མཐུད་ ཐུབ་པའི་འབད་བརྩོན་བྱ་རྒྱུ་ཡིན། ཞེས་གསུངས་པ་ལྟར། མི་མང་གི་བསམ་འཆར་དང་གྲོས་ཚོགས་ཀྱི་སྤྱི་མོས་གྲོས་ཆོད་ཀྱི་ལམ་ནས་གཏན་ལ་ཕབ་ ཡོད།