གྲྭ་བློ་བཟང་སྨོན་ལམ་ལགས་ཀྱིས་ཉི་ཧོང་གི་ཨོ་ཐ་ནེས་མཐོ་སློབ་ཁང་དང་ཀུ་ཤུ་ གློག་ཀླད་བཟོ་གྲྭ་གཉིས་དང་མཉམ་འབྲེལ་ཐོག སྨོན་ལམ་བོད་ཡིག་གསུམ་པ་དེང་རབས་ཀྱི་འཕྲུལ་ཆས་གསར་པའི་སྟེང་བེད་སྤྱོད་ཀྱི་ ཚོད་ལྟ་ལེགས་འགྲུབ་བྱུང་འདུག ཕྱི་ཚེས་ ༢༤ ཉིན་གྱི་གངས་ཅན་སྐྱིད་གཤོངས་ནི་དབྱར་གྱི་ཚ་སྨུག་གིས་བཏུམས་འདུག་ལ། ང་གྲྭ་བློ་བཟང་སྨོན་ལམ་ལགས་ཀྱི་སར་ཐོན་དུས། ཁོང་ནི་རང་གིས་ཡུན་རིང་འབད་བསྒྲུབ་གནང་བའི་ལས་དོན་ཞིག་ལེགས་འགྲུབ་བྱུང་སྟེ་ གདོང་ན་རྒྱལ་ཁའི་འཛུམ་མདངས་ཀྱིས་ཁེངས་འདུག བལྟས་ཚོད་ཀྱིས་ཁོང་ལ་དེ་རིང་གི་ཚ་གདུང་འདིས་ངལ་དུབ་གང་ཡང་སྟེར་གྱི་མེད་པའི་ སྣང་བ་འཆར། དེ་ཡང་ཡིན་ཏེ་ཉིན་འདི་ནི་ཁོང་གིས་ཉི་ཧོང་དུ་རྟེན་གཞི་བྱས་པའི་ཨོ་ཐ་ནེས་མཐོ་ སློབ་ཁང་ Otani University དང་ཀུ་ཤུ་བཟོ་གྲྭ་ Apple Inc. གཉིས་དང་མཉམ་འབྲེལ་ཐོག་ iphone ཁ་པར་དང་ ipad དང་ ipod བཅས་སུ་རྒྱལ་སྤྱིའི་གཅིག་གྱུར་ཨང་སྒྲིག་ཐོག་ཡོད་པའི་སྨོན་ལམ་བོད་ཡིག་གསུམ་ པ་ཚོད་ལྟ་ལེགས་འགྲུབ་བྱུང་སྟེ། བོད་སྐད་ཡིག་འདི་བཞིན་འཛམ་གླིང་གི་དེང་རབས་ཀྱི་ཐོན་རྫས་གསར་བའི་ནང་དུ་བེད་ སྤྱོད་གཏོང་ཐུབ་པར་གྱུར་བས་ཡིན། ཁོང་གིས་སྤྲོ་སེམས་འཁོལ་བའི་ངང་གསུངས་དོན། ཉེ་ཆར་ངས་ཉི་ཧོང་ཨོ་ཐ་ནེས་མཐོ་སློབ་ཁང་དང་ཀུ་ཤུ་གློག་ཀླད་བཟོ་གྲྭ་གཉིས་དང་ མཉམ་འབྲེལ་ཐོག ཡུན་རིང་ཚོད་ལྟ་བྱས་པ་བརྒྱུད་ད་ལྟ་སྨོན་ལམ་བོད་ཡིག་གསུམ་པ་དེང་རབས་ཀྱི་ཐོན་ རྫས་གསར་བ་ iphone དང་ ipad དང་ ipod བཅས་སུ་ནང་འཇུག་ལེགས་འགྲུབ་བྱུང་ཡོད་པས། འཕྲུལ་ཆས་འདིའི་རིགས་ནང་ད་ནས་བཟུང་བོད་ཡིག་བེད་སྤྱོད་གཏོང་རྒྱུར་དཀའ་ངལ་གང་ ཡང་མེད་ཅེས་དང་། མཉེན་ཆས་དེ་དག་ནང་བོད་ཡིག་ལེགས་འགྲུབ་བྱུང་སྟབས། རྗེས་ཕྱོགས་ iphone ཁ་པར་ནང་ཡིག་ཆ་བསྔོག་པ་དང་དྲ་རྒྱ་བསྔོག་པ། ཡིག་ཆ་ཡར་མར་ཕབ་ལེན་བྱེད་པ་སོགས་བྱེད་ཐུབ་ཀྱིན་ཡོད། དེར་བརྟེན་དེས་གློག་ཀླད་ལྟར་བོད་ཡིག་དྲ་རྒྱ་སོགས་སྤྱོད་རྒྱུར་ཧ་ཅང་གི་སྟབས་ བདེ་བོ་ཆགས་ཡོད་པས། སྤྱི་ཡོངས་ཀྱི་ཆ་ནས་འདིས་མ་འོངས་པར་ང་ཚོར་ཕན་ཐོགས་ཆེན་པོ་ཡོང་གི་རེད། ཅེས་གདེང་ཚོད་ཆེན་པོས་གསུངས། ཡིན་ནའང་། ཁོང་གིས་དེང་སྐབས་གོང་གསལ་ཐོན་རྫས་དེ་དག་བོད་སྤྱི་ཚོགས་སུ་ད་དུང་དེ་ཙམ་ གྱིས་ཁྱབ་རྒྱ་ཆེན་པོ་མིན་སྟབས། བོད་མི་ཚང་མས་བེད་སྤྱོད་གཏོང་ཐུབ་མིན་ཐད་ད་དུང་དུས་ཡུན་གང་འཚམ་འགོར་སྲིད་ པའི་ཚོད་དཔག་གནང་གི་འདུག ཁོང་གིས་མུ་མཐུད་དེ་གསུངས་དོན། གནས་སྐབས་རིང་བོད་མི་ཚོས་ཐོན་རྫས་གསར་བ་འདི་དག་བེད་སྤྱོད་གཏོང་ཐུབ་མིན་བཤད་ ཁག་པོ་རེད། ཡིན་ནའང་། རིམ་གྱིས་བོད་མི་ཚོས་ཐོན་རྫས་འདིའི་རིགས་སྤྱོད་རྒྱུར་ཧ་ཅང་གལ་ཆེན་པོར་ཆགས་ ཡོད། ལྷག་པར་དུ་ ipad ལྟ་བུར་མཚོན་ན་འཛམ་གླིང་ནང་སྐད་གྲགས་ཆེ་བའི་ཐོན་རྫས་གསར་ཤོས་ཀྱི་ཅ་ལག་རེད། དེར་བརྟེན་དེའི་ནང་དུ་བོད་ཡིག་ཏག་ཏག་ཅིག་བེད་སྤྱོད་གཏོང་ཐུབ་ཚེ་བོད་སྐད་ ཡིག་ཐད་ནས་དགེ་མཚན་ཆེན་པོ་ཡོང་གི་རེད་ཅེས་གསུངས། དེས་ནི་ཁོང་གིས་ད་བར་སྨོན་ལམ་བོད་ཡིག་དང་པོ་དང་གཉིས་པ། གསུམ་པ། གཞན་ཡང་སྨོན་ལམ་བོད་ཀྱི་ཐུན་མོང་སྐད་གདངས་སོགས་རིམ་བཞིན་བཟོས་ཏེ། བོད་སྐད་ཡིག་འདི་ཡང་འཛམ་གླིང་གི་རྒྱལ་ཁབ་གཞན་ཁག་གི་སྐད་ཡིག་དང་དཔུང་པ་མཉམ་ གཤིབ་བྱ་ཐུབ་པའི་སྐད་ཡིག་ཅིག་ཆགས་རྒྱུར་འབད་བརྩོན་གནང་གིན་ཡོད་སྟབས། བོད་སྐད་ཡིག་ལ་བཅངས་པའི་དུང་ཞེན་མཚོན་འདུག གང་ལྟར་འདི་ནི་ཁོང་གིས་ལོ་སྔོན་མའི་ལོ་མགོར་སྨོན་ལམ་བོད་ཡིག་གསུམ་པ་དང་ སྨོན་ལམ་བོད་ཀྱི་ཐུན་མོང་སྐད་གདངས་གཉིས་བཟོ་སྐྲུན་ལེགས་འགྲུབ་བྱུང་རྗེས། བོད་སྐད་ཡིག་འདི་བཞིན་རྒྱལ་སྤྱི་རང་བཞིན་ཅན་དང་དུས་རབས་རང་བཞིན་ཅན། དེང་རབས་ཀྱི་ཐོན་རྫས་ཆེས་གསར་བའི་བརྡ་འཕྲིན་རིགས་སུ་བེད་སྤྱོད་བྱེད་རྒྱུའི་ བྱ་བ་ཧུར་ཐག་གིས་བསྒྲུབས་ཏེ། ལེགས་འགྲུབ་བྱུང་བ་ཐོག་མ་དེ་ཆགས་ཡོད། ཁོང་གིས་ད་དུང་། གོང་གསལ་ཐོན་རྫས་དེ་དག་ནང་དུ་སྨོན་ལམ་བོད་ཡིག་ཙམ་མིན་པར་མི་རིང་བར་ལེགས་ འགྲུབ་འབྱུང་ལ་ཉེ་བའི་སྨོན་ལམ་ཚིག་མཛོད་ཀྱང་རིམ་གྱིས་འཇུག་གཏན་འཁེལ་ཡོད། ཅེས་གསུངས། སྨོན་ལམ་ཚིག་མཛོད་ཆེན་མོ་ནི་ལོ་སྔོན་མའི་ཟླ་ ༧ ནས་མགོ་བརྩམས་ཏེ་ད་བར་ལོ་གཅིག་རིང་བསྒྲིགས་པའི་དབྱིན་བོད་ཚིག་མཛོད་ཅིག་ཡིན་ ལ། དེའི་ནང་དུ་བོད་དབྱིན་ཚིག་མཛོད་ ༼ བོད་དབྱིན་ཚིག་མཛོད་རྐྱང་པ་ ༽ དང་དབྱིན་བོད་ཚིག་མཛོད་ ༼ བོད་ཡིག་གི་ནང་དོན་དབྱིན་ཡིག་ནང་ཡོད་པ་ ༽ བོད་དབྱིན་ཚིག་མཛོད་ ༼ དབྱིན་ཡིག་གི་ནང་དོན་བོད་ཡིག་ནང་ཡོད་པ་ ༽ ། གསར་བྱུང་ཚིག་མཛོད་སོགས་ཡོད་ལ། ཚིག་མཛོད་དེའི་ནང་བོད་དབྱིན་གྱི་ཐ་སྙད་ཉིས་འབུལ་ལྷག་ནང་འཇུག་བྱེད་བཞིན་པ་ དང་། ཚོད་དཔག་བྱས་པ་ལྟར་ན་འདི་ལོའི་ལོ་མཇུག་བར་དུ་དངོས་སུ་སྤྱི་ཚོགས་ཁྲོད་དགྲམ་ ཐུབ་པ་བྱུ་རྒྱུ་ཡིན་འདུག ཁོང་གིས་ཚིག་མཛོད་འདི་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་ལ་ སྤྱན་འབུལ་ཞུས་པ་མ་ཟད། ཟླ་འདིའི་ཕྱི་ཚེས་ ༡༤ ཉིན་༧གོང་ས་མཆོག་ལའང་སྤྱན་འབུལ་ཞུས་ཡོད་འདུག་ལ། མི་རིང་བར་ཚིག་མཛོད་འདིའི་སྐོར་ལ་བཙན་བྱོལ་གྱི་མཁས་དབང་ཁག་ཅིག་གདན་ཞུས་ ཀྱིས་བགྲོ་གླེང་དང་གྲོས་བསྡུར་བྱ་རྒྱུ་ཡིན་པ་དང་། དེ་ལྟར་བྱེད་དོན་ཚིག་མཛོད་འདི་ང་མི་སྒེར་བ་ཞིག་གི་ལྟ་བ་དང་ལངས་ཕྱོགས་ཙམ་ མིན་པར། ཡོངས་གྲགས་ཅན་ཞིག་ཏུ་ཆགས་ཐུབ་ཆེད་ཡིན་ཞེས་གསུངས། ཚིག་མཛོད་དེའི་ཁྱད་ཆོས་གཙོ་བོ་བོད་ཡིག་གི་མིང་ཚིག་ཅིག་གི་གོ་དོན་བཙལ་སྐབས། ཚིག་དེའི་གོ་དོན་བཙལ་བདེ་བ་དེ་ཡིན། དཔེར་ན། ༼ གྲངས་ ༽ ལྟ་བུ་ཞིག་འཚོལ་བཤེར་བྱེད་སྐབས། གྲངས་ཞེས་པའི་བོད་ཡིག་དེ་དབྱེ་འདེམས་ Select བྱས་རྗེས། བོད་དབྱིན་གང་གི་ནང་དུ་ཚིག་དེའི་གོ་དོན་བཙལ་དགོས་ནའང་། བོད་ཡིག་གི་གོ་དོན་དགོས་ན་བོད་ཡིག་སྟེང་ནས་འདེགས་གནོན་དང་། དབྱིན་ཡིག་གི་གོ་དོན་དགོས་ན་དབྱིན་ཡིག་སྟེང་ནས་འདེགས་གནོན་བྱས་རྗེས། གྲངས་ཞེས་པའི་ཚིག་གི་གོ་དོན་རང་ཤུགས་ཀྱིས་བཙལ་ཡོང་བ་དེ་རེད། དེ་བཞིན་ཚིག་མཛོད་འདིའི་སྟེང་དུ་གདམ་ག་ཞེས་པ་ཞིག་ཡོད་ཅིང་། དེའི་སྟེང་ནས་ཡིག་གཟུགས་ཆེ་ཆུང་རང་གིས་གང་འདོད་ལྟར་བསྒྲིག་ཆོག་པར་མ་ཟད། རྒྱབ་ལྗོངས་ཀྱི་ཚོན་མདོག་སོགས་ཀྱང་རང་གིས་གདམ་ཆོག མཇུག་མཐར་ཁོང་གིས། ང་ཚོས་དེང་རབས་ཀྱི་འཕྲུལ་ཆས་གསར་བའི་རྗེས་ཟིན་ཐུབ་པ་བྱ་རྒྱུ་གལ་ཆེན་པོ་ཡིན་ སྟབས། ཐེངས་འདིའི་ཚོད་ལྟ་ལེགས་འགྲུབ་འདི་ང་ཚོས་དེང་རབས་ཀྱི་འཕྲུལ་ཆས་གསར་བའི་ རྗེས་ཆོད་རྒྱུའི་ཐེམ་སྐས་དང་པོ་བརྒལ་ཟིན་པའི་དཔེ་མཚོན་ལྟ་བུ་རེད་ཅེས་གསུངས། གྲྭ་བློ་བཟང་སྨོན་ལམ་ལགས་ལོ་སྔོན་མར་ཉི་ཧོང་ནང་རྟེན་གཞི་བྱས་པའི་ཀུ་ཤུ་ རྟགས་ཅན་གྱི་གློག་ཀླད་བཟོ་གྲྭ་དང་། ཨོ་ཐ་ནེས་མཐོ་སློབ་ཁང་གཉིས་སུ་ཆེད་ཕེབས་ཀྱིས་ཀུ་ཤུ་རྟགས་ཅན་གྱི་གློག་ཀླད་ ནང་། རྒྱལ་སྤྱིའི་གཅིག་གྱུར་ཨང་སྒྲིག་ཐོག་ཡོད་པའི་སྨོན་ལམ་བོད་ཡིག་གསུམ་པ་ལྡུག་ རྒྱུར་མཉམ་འབྲེལ་གནང་སྟེ། ཕྱི་ལོ་ ༢༠༡༡ ལོ་ནས་བཟུང་ཀུ་ཤུ་རྟགས་ཅན་གྱི་གློག་ཀླད་ནང་སྨོན་ལམ་བོད་ཡིག་རང་ཆས་སུ་ཡོད་པ་ བྱ་གཏན་འཁེལ་ཡོད་པ་དང་། ཐེངས་འདིར་ཁོང་གིས་གོང་གསལ་ཐོན་རྫས་གསར་བ་དག་ཏུའང་སྨོན་ལམ་བོད་ཡིག་གསུམ་པ་ ཚོད་ལྟ་ལེགས་འགྲུབ་བྱུང་སྟེ། འབྱུང་འགྱུར་གྱི་ལོ་ཟླའི་ནང་བོད་མི་རྣམས་ཀྱི་རང་རང་གི་ལག་ཁྱེར་ཁ་པར་ལས་བོད་ ཡིག་གི་དྲ་རྒྱ་སྔོག་པ་དང་ཡིག་ཆ་ཉར་ཚགས་བྱེད་པ་སོགས། བོད་ཡིག་བཀོལ་སྤྱོད་བྱེད་པ་སོགས་ལ་དཀའ་ངལ་མེད་པ་བྱ་རྒྱུ་ཡིན་འདུག ཡང་ཁོང་གིས། དེང་སྐབས་ད་དུང་གོང་གསལ་ཚོགས་པ་གཉིས་དང་ང་ཚོས་མི་རིང་བར་ལེགས་འགྲུབ་འབྱུང་ བ་ཉེ་བའི་སྨོན་ལམ་ཚིག་མཛོད་ཆེན་མོ། ཀུ་ཤུ་རྟགས་ཅན་གྱི་གོང་གསལ་ཐོན་རྫས་སོགས་ཀྱི་ནང་དུ་རང་ཆས་སུ་སྒྲིག་རྒྱུར་ འབད་བརྩོན་བྱེད་ཀྱིན་ཡོད་ལ། གོང་གསལ་ཚོགས་པ་གཉིས་ཀྱིས་སྨོན་ལམ་ཚིག་མཛོད་ཆེན་མོར་དམིིགས་བསལ་གྱི་ཐུགས་ སྣང་གནང་གི་འདུག་ཅེས་གསུངས། འདི་ལྟར་སྤྱིར་བཏང་བའི་གྲྭ་རྐྱང་དཀྱུས་མ་ཞིག་གི་གནས་བབ་ནས་དེང་རབས་ཀྱི་ཚན་ རིག་པ་ཞིག་ཏུ་གྱུར་བའི་གྲྭ་བློ་བཟང་སྨོན་ལམ་ལགས་ཀྱིས། ཕྱོགས་སྣ་སྒོར་མོ་ནས་བོད་སྐད་ཡིག་འདི་བཞིན་བརྡ་འཕྲིན་དུས་རབས་ཀྱི་རྗེས་ཆོད་ རྒྱུར་རླབས་ཆེ་ཞིང་ལོ་རྒྱུས་ཀྱི་དོན་སྙིང་ལྡན་པའི་བྱ་བཞག་བསྐྱངས་དང་སྐྱོང་ བཞིན་པ་ཡིན་ལ། ཁོང་གིས་ད་དུང་མ་འོངས་པར་བོད་དབྱིན་ཡག་པོ་ཡོད་པའི་ལས་རོགས་པ་བྱུང་ན། ཀུ་ཤུ་རྟགས་ཅན་གྱི་གློག་ཀླད་ནང་གི་མཉེན་ཆས་ཡོད་ཚད་བོད་ཡིག་ཐོག་བཟོ་ཐུབ་པ་ བྱ་རྒྱུའི་དམིགས་འདུན་ཡང་བཅངས་འདུག