གཏེར་ཁ་སྔོག་འདོན་མཚམས་འཇོག་གི་སྙན་སྐུལ་ལ་རྒྱ་ནག་གཞུང་གིས་ཨ་ལན་སྤྲད་མེད་པ། བོད་ ཀྱི་རྒྱལ་ས་ལྷ་སའི་ཤར་ཕྱོགས་སུ་ཡོད་པའི་མལ་གྲོ་གུང་དཀར་རྫོང་ཁོངས་སུ་ ཕྱི་ལོ་༢༠༠༩སྤྱི་ཟླ་༦ཚེས་༢༠ཉིན་རྒྱ་མི་གཏེར་ཁ་སྔོག་འདོན་བྱེད་མཁན་གྱིས་ཡུལ་ ཆུ་བཀག་སྟེ་ཡུལ་མིར་ཞིང་ཆུ་གཏོང་མི་ཐུབ་པའི་དཀའ་ངལ་འཕྲད་རྗེས་ས་གནས་ཡུལ་མི་ དང་རྒྱ་མི་གཏེར་ཁ་སྔོག་འདོན་བྱེད་མཁན་དབར་འཁྲུག་རྩོད་བྱུང་སྟེ་བོད་མི་གསུམ་ ལ་རྨས་སྐྱོན་ཚབས་ཆེན་ཕོག་པ་དང༌།ཟླ་༦ཚེས་༢༡ཉིན་བོད་རང་སྐྱོང་ལྗོངས་ཀྱི་ འབྲེལ་ ཡོད་ལས་བྱེད་ས་གནས་སུ་ཡོང་སྐབས་མང་ཚོགས་རྣམས་ནས་དགོས་འདུན་བཏོན་པ་གཙོ་བོ་ ནི་རྒྱ་མི་གཏེར་ཁ་འདོན་མཁན་རྣམས་ལུང་པ་དེ་ནས་ཕྱིར་ལོག་བྱེད་དགོས་པ་རེད།ཁོང་ ཚོ་ང་ཚོའི་ལུང་པར་སླེབས་པ་ནས་བཟུང་འཐུང་ཆུ་དུག་ཆུར་བསྒྱུར་བ་དང༌།ཆུ་མིག་ སྐམ་ པ།རྩི་ཤིང་རི་དྭགས་རྩ་མེད་བཏང་བ།ཞིང་འབྲོག་གི་སྒོ་ཕྱུགས་སེམས་ཅན་ཆིག་སྟོང་ ལྷག་དུག་ཆུ་བཏུང་སྟེ་ཤི་ཡོད་པ་སོགས་ཀྱི་སྐོར་མང་ཚོགས་ཚོས་ངུ་བཞིན་ཞུ་འབོད་ བྱས་ཡོད་སྟབས།དེ་མཇུག་ཉིན་གཅིག་གི་རྗེས་རྒྱ་མི་གཏེར་འདོན་པ་རྣམས་ས་གནས་ནས་ ཕྱིར་ལོག་བྱས་རྗེས་རྫོང་ནས་ལས་དོན་ཚོགས་ཆུང་བཏང་སྟེ་ཁྱིམ་ཚང་རེ་རེ་བྱས་ནས་ གཏེར་ཁ་སྔོག་འདོན་བཀག་འགོག་བྱ་མི་ཆོག་པ་དང༌།རྗེས་སུ་གནས་ཚུལ་དེ་ལྟར་བྱུང་ ཚེ་ཆབ་སྲིད་ཐོག་ཐག་གཅོད་བྱ་རྒྱུ་ལས་གཞན་འགྲོ་ས་མེད་པའི་སྐོར་འཇིགས་སྐུལ་ བྱས་ཡོད་པ་མ་ཟད།གཏེར་འདོན་ལས་གྲྭས་གནོད་སྐྱོན་བྱུང་བ་རྣམས་ལ་གུན་གསབ་སྤྲོད་ རྒྱུ་སོགས་བཤད་ཡོད་ཀྱང༌།ཉེ་ཆར་མལ་གྲོ་རྒྱ་མ་ཤང་ཁོངས་ཀྱི་རུ་ཁག་བཅོ་ལྔ་ཡོངས་ རྫོགས་ནས་བསམ་འདུན་གཅིག་གྱུར་གྱིས་གཏེར་འདོན་ལས་གྲྭ་མཚམས་འཇོག་ཡོང་བའི་སྙན་ ཞུ་ཞིག་མལ་གྲོ་གུང་དཀར་རྫོང་ལ་སླར་ཡང་ཕུལ་ཏེ་བརྡ་ལན་ཡོང་རྒྱུར་རེ་སྒུག་བྱས་ ཡོད་ཀྱང༌།རྒྱ་གཞུང་ནས་དེ་ལས་ལྡོག་སྟེ་ད་ལྟ་ས་གནས་དེར་དམག་མི་ཤུགས་ཆེ་བཀྲམ་ ཡོད་པ་མ་ཟད།ཁ་པར་སོགས་འབྲེལ་ལམ་བྱ་རྒྱུ་དང་ཕྱི་ཕྱོགས་ནས་ས་གནས་དེར་ཡོང་བའི་ འགྲུལ་པར་དམ་དྲག་ཆེན་པོ་བྱེད་བཞིན་ཡོད་འདུག ད་ ལྟའི་ཆར་ས་གནས་སུ་དམག་མིས་དམ་དྲག་ཤུགས་ཆེན་བྱེད་བཞིན་པའི་ཐོག་ས་གནས་རྒྱ་ གཞུང་ནས་དངུལ་དངོས་སྤྲད་དེ་གསོ་སྐྱོང་བྱས་པའི་མི་སྣ་ཧུར་བརྩོན་ཅན་ཁག་གཅིག་ གིས་མང་ཚོགས་ལ་འཇམ་རྩུབ་གཉིས་ཐོག་ནས་གཏེར་འདོན་ལས་གྲྭ་འགོ་འཛུགས་བྱེད་འཇུག་ དགོས་པའི་སྐུལ་སློང་བྱེད་བཞིན་ཡོད་འདུག་པ་དང༌།ས་གནས་མང་ཚོགས་ཚོས་གོ་སྐབས་ དེ་དང་བསྟུན་ནས་རྒྱལ་སྤྱིའི་སྟེང་གི་ཁོར་ཡུག་ཚོགས་པ་དང༌།འཕྲོད་བསྟེན་ལྟ་ རྟོག་ཚོགས་པ་སོགས་ནས་ཁོང་ཚོའི་རེ་འབོད་དེ་དག་ལ་རྒྱབ་སྐྱོར་གྱིས་ས་གནས་མི་ མང་ལ་ཕན་ཐོགས་མེད་པའི་གཏེར་འདོན་ལས་གྲྭ་དེ་གང་མགྱོགས་མཚམས་འཇོག་ཡོང་ཐབས་ལ་ རེ་བ་ཆེན་པོ་བྱེད་བཞིན་ཡོད་འདུག ཡིན་ནའང་མལ་གྲོ་གུང་དཀར་རྫོང་འབྲེལ་ཡོད་ཚན་པས་མང་ཚོགས་ཀྱི་སྙན་ཞུར་ད་བར་ཡ་ ལན་གང་ཡང་སྤྲད་མེད་པའི་གནས་ཚུལ་ཐོན་བཞིན་འདུག། བཙན་བྱོལ་བོད་གཞུང་དྲ་ཚིགས་ལས་དྲངས།