ཕྱི་ལོ་༢༠༡༡ལོའི་ཟླ༤ཚེས་༢༦ཉིན་གྱི་གལ་ཆེའི་གསར་འགྱུར་ཁག
ཕྱི་ལོ་༢༠༠༨ལོ་ནས་དེང་གི་བར་རྒྱ་ནག་དམར་པོའི་གཞུང་གིས་བོད་ཡུལ་སྤྱི་དང་ སྒོས་བོད་མདོ་སྨད་རྔ་བ་ཀི་རྟིའི་དགོན་གྲོང་གཉིས་ལ་དྲག་པོས་བཙན་གནོན་ཤུགས་ ཆེན་བྱས་པའི་ཉེར་ལེན་ལ་བརྟེན། བོད་རྒྱལ་གཅེས་སྐུ་གཤེགས་དཔའ་བོ་བློ་བཟང་ཕུན་ཚོགས་ལགས་ཀྱིས་རྒྱ་ནག་དམར་ པོའི་བཙན་འོག་ཏུ་དམྱལ་བ་མི་ཡུལ་དུ་མྱོང་བཞིན་པ་ལྟ་བུའི་མི་རིགས་འདིས་མགོ་ ཐོག་གི་སྡུག་བསྔལ་མཐའ་དག་འཛམ་གླིང་མི་མང་ལ་བདེན་དབང་ཁུངས་སྐྱེལ་དང་། བོད་མི་རིགས་ཀྱི་བདེན་མཐའི་ཆེད་དུ་ལུས་སྲོག་ལོངས་སྤྱོད་དང་བཅས་པ་ཕངས་མེད་ དུ་དོར་ནས་རང་ལུས་མེར་བསྲེགས་གཏོང་དགོས་བྱུང་ཡོད། རྒྱ་ནག་གཞུང་གིས་གཅིག་སྡུད་སྲིད་དབང་གི་ལྐོག་བཅས་གཡོ་འགེབས་དང་། འཛམ་གླིང་མི་མང་ལ་བོད་ཡུལ་གྱི་ས་གནས་ཡུལ་གྲུ་ཐམས་བཅད་དུས་བདེ་གནས་འཇམ་ཡིན་ པའི་རྣམ་པ་མངོན་ཆེད་བོད་མདོ་སྨད་ཁུལ་གྱི་ཆོས་སྡེ་ཆེན་པོ་དེ་ཉིད་མི་མངོན་ པའི་ལམ་ནས་ཤུལ་མེད་རྩ་བརླག་བྱེད་རྒྱུར་དྲག་པོའི་དམག་དཔུང་གིས་དགོན་པ་བཙོན་ རར་བསྒྱུར་ཞིང་། ལོ་ལོན་རྒན་རྒོན་དང་ནར་མ་སོན་པའི་བྱིས་པ་ཡན་ཆོད་ལ་དྲག་པོས་སྡུག་རྡུང་ཚད་ མེད་དང་། དམར་གསོད་བཙོན་འཇུག་སོགས་བྱེད་དང་བྱེད་མུས་སུ་མཆིས། ཕོ་བརྒྱའི་སྙིང་སྟོང་ཀླད་ལ་སྐོར་ཞིང་མོ་བརྒྱའི་ཨག་སྐད་དགུང་ལ་བསྙེགས་པའི་ ཚད་མེད་མནར་གཅོད་ཀྱི་དུས་སྐབས་འདིར། རྒྱལ་ཁབ་ཕྱི་ནང་གི་བོད་མི་སྤྱི་བོ་གནམ་སྟན་ཚང་མས་ལས་དོན་འདིས་ཆེད་གདུང་ སེམས་མཉམ་བསྐྱེད་དང་སྐྱིད་སྡུག་མཉམ་མྱོང་གིས་ལས་འགུལ་རབ་དང་རིམ་པ་ཞིག་སྤེལ་ དང་སྤེལ་བཞིན་ཡོད།
བཞུགས་སྒར་རྡ་ས་ཁུལ་དུ་ཕྱི་ལོ་༢༠༡༡ལོའི་ཟླ༤ཚེས་ ༢༦ཉིན་གྱི་ཞོགས་པའི་དུས་ཚོད་༩ཐོག་འགོ་བཟུང་པའི་ལས་འགུལ་ཁག་ནི་རྔ་བ་ཁུལ་མི་མང་གིས་གཙོས་དབུས་ཚོགས་སྐྱིད་ ཁག་བཅུ་གཉིས་སྟེ་དབུས་གཙང་ཆོལ་ཁ་དང་། མདོ་སྟོད་ཆོལ་ཁ། མདོ་སྨད་ཆོལ་ཁ། དབུ་མའི་ལམ་གྱི་ལས་འགུལ་ཁང་། ཆོལ་གསུམ་ཆིག་བསྒྲིལ་ཚོགས་པ། བོད་རྒྱལ་ཡོངས་ཆབ་སྲིད་བཙོན་གྲོལ་ཚོགས་པ། མངའ་རིས་སྤྱི་མཐུན་ཚོགས་པ། རྡ་ས་དང་བླངས་མི་མང་། རྡ་ས་ཚོང་ཁང་སྐྱིད་སྡུག རྡ་ས་ཟ་ཁང་སྐྱིད་སྡུག་བཅས་ཀྱིས་བཀོད་སྒྲིག་གིས་༸གོང་ས་སྐྱབས་མགོན་ཆེན་པོ་ མཆོག་ཚོགས་མགོན་དུ་ཆིབས་བསྒྱུར་བཀའ་དྲིན་ཆེ་ཐོབ་དང་། བཙན་བྱོལ་བོད་གཞུང་གི་མང་གཙོ་ག་བ་གསུམ་གྱི་མཛད་གཙོ་རྣམ་པས་གཙོས་བཞུགས་སྒར་ཁུལ་ གྱི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་དང་སེར་སྐྱ་མི་མང་ སྟོང་ཕྲག་གསུམ་བརྒལ་བས་མཆོད་འབུལ་སྨོན་ལམ་རྒྱ་ཆེན་ཞིག་གནང་གྲུབ་ཡོད་ལ། ཟས་བཅད་ངོ་རྒོལ་དང་། མར་མེ་ཁྲོམ་སྐོར་སོགས་ཀྱི་ལས་འགུལ་མུ་མཐུད་སྤེལ་མུས་སུ་ཡོད།

དེ་བཞིན་ཀིརྟིའི་བྱེས་པ་གྲྭ་ཚང་གིདགེ་འདུན་པ་བརྒྱ་ལྷག་གི་གཙོ་བོར་གྲུབ་པའི་དགེ་འདུན་པའི་སྡེ་ཁོ་ནའི་སེར་སྦྲེངས་སྙན་སྐུལ་སྨོན་ལམ་རྒྱང་བཞུད་བཞུགས་ སྒར་རྡ་ས་ནས་རྒྱལ་ས་ལྡི་ལི་བར་བསྐྱོད་པའི་དབུ་འཛུགས་གསུང་བཤད་དཔལ་ལྡན་བཀའ་ བློན་ཁྲི་པ་མཆོག་གིས་མཛད་པ་དང་། ལས་འགུལ་འདིའི་ཐོག་མཐའ་བར་གསུམ་གྱི་ལས་དོན་བཀོད་སྒྲིག་བྱེད་མཁན་ལ་བོད་མི་ མང་སྤྱི་འཐུས་རྣམས་དང་མདོ་སྨད་ཆོལ་ཁའི་དབུས་སྤྱི་ཁྱབ་རྒྱུན་ལས་ཆ་ཚང་མཉམ་ ཞུགས་བྱས་ཡོད། ཉིན་དང་པོའི་ལས་འགུལ་གྱི་གནས་ཚུལ་རིམ་སྒྲིགས། ལས་འགུལ་འདིའི་དབུ་འཛུགས་མཛད་སྒོར་དཔལ་ལྡན་བཀའ་བློན་ཁྲི་པ་མཆོག་དང་། བོད་མི་མང་སྤྱི་འཐུས་ཚོགས་གཙོ་སྦྲེལ་པོ། བཀའ་ཟུར་སྐྱབས་རྗེ་ཀིརྟི་རིན་པོ་ཆེ། བཀའ་ཟུར་ཨ་ལགས་འཇིགས་མེད་རིན་པོ་ཆེ། བོད་མི་མང་སྤྱི་འཐུས་རྒྱུན་ལས་རྣམ་པ། སྐྱབས་རྗེ་ཤིང་བཟའ་རིན་པོ་ཆེ། མདོ་སྨད་དབུས་སྤྱི་ཁྱབ་རྒྱུན་ཚོགས་གཙོའི་གཙོས་རྒྱུ་རྒྱུན་ལས་རྣམ་པ་བཅས་མཉམ་ ཞུགས་བྱས་ཡོད། གཉིས་པ། སེར་སྦྲེངས་སྙན་སྐུལ་སྨོན་ལམ་རྒྱང་བཞུད་ལ་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་ལྷ་རགས་སྒྲོན་བཞིན་པའི་རྣམ་པ། གསུམ་པ། བཞུགས་སྒར་རྡ་སའི་རི་ལམ་ནས་ཀང་ར་རྫོང་གི་མངའ་ཁོངས་རྒྱུད་བཞིན་པའི་རྣམ་པ། བཞི་བ། ཉིན་གུང་གསོལ་ཚིགས་ཀྱི་སྐབས་དང་བསྟུན་མ་ཀྲེར་ས་ཆར་TIMES NOW གསར་ཁང་གི་གསར་འགོད་པར་གསར་འགོད་གསར་བསྒྲགས་གནང་པ། ལྔ་བ། ཀང་ར་རྫོང་ཐོག་ལ་འབྱོར་མ་ཐག་ཧི་མ་ཅལ་མངའ་སྡེ་བློན་ཆེན་ཟུར་པ་དང་ད་ལྟའི་ གྲོས་ཚོགས་འཐུས་མི་སྐུ་ཞབས་བྷ་ལེ་གཙོས་ཀང་ར་རྫོང་གི་ཀང་རི་སུའི་གཙོ་འཛིན་ ལྕམ་སྐུ་སཱོའུ་མིན། ཀང་རི་སིའི་མངའ་སྡེ་གཞོན་ནུའི་གཙོ་འཛིན། བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ། སྤྱི་འཐུས་རྒྱུན་ལས་འཐུས་མི། རྒྱ་གར་གསར་འགོད་ཁག་བཅོ་ལྔ། བོད་ཀྱི་གསར་འགོད་ཁག་བཞི་བཅས་མཉམ་ཞུགས་ཀྱིས་དམིགས་བསལ་སྐུ་མགྲོན་རྣམ་པས་ གསུང་བཤད་དང་སྦྲེལ་གསར་འགོད་གསར་བསྒྲགས་རྒྱས་པ་ཞིག་སྤེལ་བ་དང་མཉམ་སྐུ་ཞབས་ བྷ་ལེ་སོགས་ཀྱིས་སེར་སྦྲེངས་སྙན་སྐུལ་རྒྱང་བཞུད་པ་རྣམས་པར་དགོང་ཁའི་གསོལ་ ཚིགས་ཕུལ་ཡོད། དུས་ཚོད་དྲུག་པའི་ཐོག་ཀང་ར་གནས་སྡོད་བོད་མི་རྣམས་ཀྱིས་ཆུ་དང་ཞལ་ཏོག་གནང་ སྟེ་སྐྱེལ་མ་གང་ལེགས་གནང་།