ཉེ་བའི་ཆར་ཡུལ་མདོ་སྨད་འབྲུག་ཆུ་རྫོང་དེ་རྒྱ་གཞུང་གི་སྲིད་འཛིན་ས་ཁོངས་ཀན་ སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་འབྲུག་ཆུ་རྫོང་དུ་ཕྱི་ལོ ༢༠༡༠ ལོའི་ཟླ ༨ ཚེས ༧ 
ཉིན་གྱི་མཚན་མོ་ཆུ་ཚོད ༡༠ ཙམ་ནས་དྲག་ཆར་བབ་ཏེ་ཟླ ༨ ཚེས་༨ ཉིན་ཆུ་ལོག་གི་གནོད་འཚེ་ཤུགས་ཆེན་བྱུང་འདུག ད་བར་མི ༡༡༤༤འདས་གྲོངས་སུ་ཕྱིན་ཡོད་པ་དང་།མི་༡༢༤༢བསྐྱབས་པ་ མི་༡༡༤༨གར་སོང་ཆ་མེད་དུ་གྱུར་ཡོད་འདུག ས་ཆ་དེ་ནི་ལོ་རྒྱུས་རང་བཞིན་གྱི་བོད་ཀྱི་མཐའ་མཚམས་ས་ཁུལ་ཞིག་ཡིན་ལ། བརྒྱུད་ལམ་ཁག་ནས་ཤེས་རྟོགས་བྱུང་བ་ལྟར་ན་འདམ་རུལ་གྱི་ཞེང་ཚད་ལ་མི་ཊར ༥༠༠ ལྷག་དང་། རིང་ཚད་ལ་སྤྱི་ལེ ༥ ཙམ་ཡོད་འདུག ས་ཆ་དེར་ཁྱོན་མི་འབོར་ཆིག་འབུམ་སུམ་ཁྲི་ཙམ་ཡོད་པའི་ཁྲོད་བོད་རིགས་བཞི་ཁྲི་ ལྷག་ཡོད་པ་དེས་མི་འབོར་གྱི་གསུམ་ཆའི་གཅིག་ཟིན་པ་དང་། ས་ཁྱོན་གྱི་སུམ་ཆའི་གཉིས་ཙམ་ལ་བོད་རིགས་གནས་སྡོད་བྱས་ཡོད། ཞང་ངམ་ཡུལ་ཚོ ༢༠ ཡོད་པ་ལས་རྒྱ་རིགས་ཁོ་ནའི་ཞང ༢ དང་། བོད་རྒྱ་འདྲེས་མ་ཉུང་ཤས་ཕུད། ཕལ་ཆེ་བ་བོད་རིགས་ཀྱི་ཡུལ་ཚོ་ཁོ་ན་ཡིན་པ་མ་ཟད། ཀན་ལྷོ་བོད་རིགས་རང་སྐྱོང་ཁུལ་གྱི་ཞིང་ལས་རྐྱང་པའི་རྫོང་གཅིག་པུ་ཡིན་ལ་རྒྱ་ ནག་རྒྱལ་ཡོངས་རིམ་པའི་དབུལ་ཕོངས་ཀྱི་རྫོང་ཞིག་ཀྱང་ཡིན་འདུག
འདི་ལྟར་བརྒྱུད་ལམ་ཁག་གི་གནས་ཚུལ་ལ་གཞིགས་ན་འདི་ལྟ་བུའི་ཆུ་ལོག་གི་གནོད་ འཚེ་ཆེན་པོ་ཞིག་ཡོང་དགོས་པའི་རྒྱུ་རྐྱེན་གཙོ་བོ་ནི་རྒྱ་ནག་གཞུང་གིས་ཁོར་ ཡུག་གསུང་སྐྱོབ་ལ་དོ་སྣང་ཆུང་བའམ་ཡང་ན་རང་བྱུང་ཁམས་ལ་གཏོར་སྐྱོན་ཚད་ལས་ བརྒལ་བ་བཏང་བས་རྒྱུ་ཁོ་ནར་རག་ལས་ཡོད་འདུག
དེ་ཡང་འབྲུག་ཆུ་རྫོང་ས་ཆུ་སྲུང་འཛིན་ལས་ཁུངས་ནས་བཏོན་པའི་༼འབྲུག་ཆུ་རྫོང་ ཆུ་གློག་སྔོག་འདོན་འཛུགས་སྐྲུན་ཁྲོད་ས་ཆུ་སྲུང་འཛིན་སྔོན་འགོག་དོ་དམ་གྱི་ བྱེད་ཐབས༽ཟེར་བའི་རྩོམ་ཡིག་ཏུ། ཕྱི་ལོ་༢༠༠༣ ནས་ ༢༠༠༧བར། ཆུ་གློག་སྔོག་འདོན་འཛུགས་སྐྲུན་གྱི་ལས་འཆར ༥༣ ལ་གན་རྒྱ་བཞག་ཟིན་པ་དང་། ཆུ་གློག་སྔོག་འདོན་འཛུགས་སྐྲུན་ལས་འཆར་༤༡ བསྐྲུན་ཟིན་པའམ་སྐྲུན་མུས་དང་། རྣམ་གྲངས་ ༡༢ ཙམ་གྱི་སྔོན་འགྲོའི་ལས་དོན་འཕྲད་དུ་འགོ་འཛུགས་ཞུ་འཆར་ཡིན། ཆུ་གློག་སྔོག་འདོན་འཛུགས་སྐྲུན་ལས་འཆར་འདི་དག་གིས་རྫོང་ཡོངས་ཀྱི་འཛུགས་ 
སྐྲུན་ལས་འཆར་སྤྱིའི་བརྒྱ་ཆའི་ ༨༠ཡན་ཟིན་ཡོད། བསྐྲུན་ཟིན་པའམ་སྐྲུན་མུས་ཀྱི་ཆུ་གློག་སྔོག་འདོན་འཛུགས་སྐྲུན་ལས་འཆར་ ༤༡ འདིས་ས་ངོས་སྒུལ་སྐྱོམ་གྱི་རྒྱ་ཁྱོན་བསྡོམས་ ༣༢༢.༨༣hm2 ཟིན་ཞེས་བཀོད་འདུག
ས་གཤིས་རིག་པའི་ཆེད་མཁས་པ་དབྱང་ཡུང་གིས་ཀྱང་། ཐེངས་འདིའི་ས་རུད་ཀྱི་འབྱུང་རྐྱེན་ནི་འབྲུག་ཆུ་སྟོད་རྒྱུད་དུ་ཆུ་བེད་ལས་ གཞི་རྒྱ་ཆེར་སྤེལ་སྐབས ས་རྐོ་རྡོ་སློག་གི་བྱེད་ལས་ཀྱིས་ས་གཤིོས་གྲུབ་སྟངས་སོབ་སོབ་བཟོས་སྟབས་ཀྱི་ དབང་གིས་ཡིན་ཚུལ་བཤད་ཡོད།
འབྲུག་ཆུ་རྫོང་གི་དེབ་ཐེར་དུ་བཀོད་པ་ལྟར་ན། ཕྱི་ལོ་1952ལོའི་ཟླ་ ༨་ནང་འབྲུག་ཆུ་ནགས་ལས་ཁང་བཙུགས་པ་ནས་ཕྱི་ལོ་ 1990ལོའི་བར། བསྡོམས་ཤིང་ནགས་མུའུ་ཁྲི་ 189.75གཅོད་འབྲེག་བྱས་ཡོད་པ་དང་། དེའི་ཁར་འབུད་ཤིང་དང་གང་བྱུང་ཤིང་ནགས་གཅོད་འབྲེག་གཏུབ་གསུམ་བྱེད་པ། ཤིང་ཆས་ནག་ཚོང་དང་རྐུ་འཁྱེར་སོགས་ཀྱི་རྐྱེན་པས་རྫོང་ཡོངས་ཀྱི་ཤིང་ནགས་ལོ་ རེར་མི་ཊར་རྒྱ་དཔངས་གྲུ་བཞི་མ་ཆིག་འབུམ་ཙམ་ཇེ་ཉུང་དུ་འགྲོ་བཞིན་ཡོད་པས། སྔོ་ཁེབས་ལ་གཏོར་བརླགས་ཚབས་ཆེན་དང་། སྐྱེས་ཁམས་ཁོར་ཡུག་ལ་ཚབས་ཆེའི་གཏོར་སྐྱོན་ཐེབས་ཡོད་འདུག
ཀན་སུའུ་ཞིང་ཆེན་མི་དམངས་སྲིད་གཞུང་གི་གཞུང་སྒྲུབ་ཁང་གིས་ཀན་སུའུ་ཞིང་ཆེན་ གཏེར་རྫས་ཐོན་ཁུངས་སྤྱིའི་འཆར་འགོད་དཔར་འགྲེམས་ཀྱི་བརྡ་ཁྱབ་ཅེས་པ་ཞིག་༢༠༠༣ ཟླ་༣ཚེས་༢༡ཉིན་བཀྲམ་པ་ལྟར་ན། གཏེར་ཁ་སྔོག་འདོན་གྱི་རྐྱེན་ལས་རི་ཉིལ་བ་དང་། གད་པ་རྡིབ་པ། འདམ་རུད་དང་ས་ཆུ་ཤོར་བ་སོགས་ས་གཤིས་ཀྱི་གནོད་སྐྱོན་གྱིས་ལོ་རེར་དཔལ་འབྱོར་ གྱི་གྱོང་གུད་རྒྱ་སྒོར་དུང་ཕྱུར་༦ ནས་༨ ཐེབས་པ་དང་། དེས་རྫོང་འདིའི་རང་བྱུང་གནོད་འཚེའི་གྱོང་གུད་ཀྱི་སྤྱིའི་སུམ་ཆའི་གཅིག་ཙམ་ ཟིན་པ་དང་། རྒྱ་ནག་རྒྱལ་ཡོངས་ཀྱི་ཆ་སྙོམས་ཚད། བཞི་ཆའི་གཅིག་ལས་ཆེས་ཆེར་མཐོ་བ་ཡོད་ཅེས་བཀོད་འདུག
ལན་ཀྲོའུ་སློབ་གྲྭ་ཆེན་མོའི་རིག་གཞུང་དུས་དེབ་སྟེང་བཀོད་པའི་འབྲུག་ཆུ་ དཀྱིལ་རྒྱུད་ནས་རི་ཉིལ་འདམ་རུད་འགོག་བཅོས་མ་ལག་དང་བྱེད་ནུས་ལ་ཞིབ་འཇུག་ཅེས་ པའི་རྩོམ་ཡིག་ཏུ། ནགས་ཚལ་གཏོར་ནས་ས་སྦོལ་དང་། རི་གཟར་ངོས་སུ་ས་ཞིང་འདེབས་ལས། འོས་འཚམ་མིན་པའི་གཏེར་སྔོག་ས་རྡོ་འགད་རྫས་ཀྱིས་གཏོར་བ། ལམ་བཟོ། ཆུ་གློག་ལས་གཞི་འཛུགས་སྐྲུན་དང་འཛུགས་སྐྲུན་ལས་གཞི་གཞན་དག་སོགས་ཀྱི་རྐྱེན་ ལས། ས་འཛིན་བརྟན་ཆ་ཤོར་བ་དང་། གད་རྡིབ། རི་ཉིལ་དང་འདམ་རུད་ཉིན་རེ་བཞིན་ཇེ་མང་དུ་འགྲོ་བཞིན་ཡོད་ཅེས་བཀོད་ཡོད་པ་ སོགས་ལ་གཞིགས་ན་ཐེངས་འདིའི་ཆུ་ལོག་འདམ་རུད་ཀྱི་གནོད་འཚེ་འདི་ནི་རྒྱ་གཞུང་ གིས་བོད་ཀྱི་རང་བྱུང་ཁོར་ཡུག་ལ་གཏོར་བཅོམ་ཚབས་ཆེན་བྱས་པའི་མཇུག་འབྲས་ངན་པ་ ཞིག་ཡིན་པ་དངོས་ཡོད་གནས་ཚུལ་གྱི་ཐོག་ནས་ཤེས་རྟོགས་ཐུབ་པ་ཞིག་རེད།
