བོད་རིགས་ཁོར་ཡུག་སྲུང་སྐྱོབ་པ་དང་ ཚོང་པ་གྲགས་ཅན་ཀརྨ་བསམ་འགྲུབ་ལགས་ལ་མི་ལོ་ ༡༥ བཙོན་འཇུག་ཁྲིམས་ཐག་བཅད་པ་དང་ལོ་ ༥ རིང་གི་ཆབ་སྲིད་ཀྱི་ཁེ་དབང་འཕྲོག་ཅིང་། རྒྱ་སྒོར་ཆིག་ཁྲི་ཡི་དངུལ་ཆད་བཅད་འདུག རྒྱ་ནག་གིས་ཕྱི་ཚེས་ ༢༢ ཉིན་ཀརྨ་བསམ་འགྲུབ་ལགས་ལ་ཁྲིམས་བཤེར་བྱས་ཡོད་པ་དང་། སྐབས་དེར་ཁོང་གིས་རྒྱ་ནག་གི་ཉེན་རྟོག་པ་ཚོས་ཁོང་ལ་ཉེས་རྡུང་བཏང་བ་དང་། གཉིད་འཕྲོག་པ། དེ་བཞིན་སྡུག་སྦྱོང་མནར་གཅོད་གཞན་གང་བྱས་ཀྱི་ཐད་སྐྱོན་བརྗོད་བྱས་ཡོད་མོད། ཁ་སང་ཕྱི་ཚེས་ ༢༤ ཉིན་བོད་རིགས་ཁོར་ཡུག་སྲུང་སྐྱོབ་པ་དང་ཚོང་པ་གྲགས་ཅན་ཀརྨ་བསམ་འགྲུབ་ལགས་སུ། ཤིན་ཅང་ཡན་ཆི་རྫོང་དུ་མི་ལོ་ ༡༥ རིང་གི་བཙོན་འཇུག་ཁྲིམས་ཆད་དང་། མི་ལོ་ ༥ ཆབ་སྲིད་ཀྱི་ཁེ་དབང་འཕྲོག་རྒྱུ། རྒྱ་སྒོར་ཆིག་ཁྲིའི་ཉེས་ཆད་བཅས་བཅད་ཡོད། ཁོང་ནི་ད་ལྟ་རང་ལོ་ ༤༢ ཡིན་པ་དང་གོང་འཇོ་རྫོང་བསམ་འཕེལ་ཞང་སྡོམ་པ་གྲོང་ནས་ཡིན། སྤྱིར་ཁོང་གིས་རྒྱ་ནག་གི་བཙོན་ཁང་ནང་ཡོད་པའི་རང་གི་བུ་སྤུན་གཉིས་སྐྱོབ་ཆེད་ རྒྱ་ནག་གཞུང་ལ་ཞུ་གཏུགས་བྱས་པའི་དབང་གིས་རྒྱ་ནག་གཞུང་གིས་ཁོང་ལ། དུར་སྔོག་དང་རིག་གཞུང་གི་ཤུལ་དངོས་བརྐུ་འཁྱེར་བྱས་པའི་ཉེས་པ་བཀལ་ཡོད། དོན་དངོས་སུ་ཉེས་འཛུགས་འདི་ནི་ལོ་ ༡༢ ཀྱི་ཡར་སྔོན་ལ་ཞིན་ཅང་ནས་ཁོང་ལ་བཙུགས་པ་དང་། སྐབས་དེར་ཉེན་རྟོག་པས་ཁོང་ལ་ཉེས་མེད་ཀྱི་དཀར་འདོན་བྱས་ཡོད་ནའང་། ཁ་སང་ཕྱི་ཚེས་ ༢༤ ཉིན་ཁོང་ལ་བསྐྱར་དུ་ནག་ཉེས་དེ་དག་བཙུགས་ཏེ། ཁྲིམས་ཐག་བཅད་ཡོད། ཁོང་གི་ཆུང་མ་སྒྲོལ་དཀར་ཚེ་རིང་ལགས་ཀྱིས་ཐེངས་འདིར་རྒྱ་ནག་གིས་ཀརྨ་བསམ་ འགྲུབ་ལགས་སུ་དྲང་བདེན་མིན་པའི་ཁྲིམས་ཐག་བཅད་པར་བློ་ཕམ་བྱུང་སྐོར་བརྗོད་ འདུག ཁོང་མོས་ཨེ་ཤ་ཡ་རང་དབང་རླུང་འཕྲིན་ཁང་ལ་ཁ་པར་བཏང་སྟེ་བཤད་དོན། ངས་རང་གི་ཁྱོ་གར་སྐར་མ་འགའི་རིང་ཐུག་འཕྲད་བྱེད་པ་དང་སྐད་ཆ་ཚིག་འགའ་བཤད་ རྒྱུའི་རེ་བ་བཏོན་ཡོད་ནའང་། སྐད་ཆ་བཤད་པའི་གོ་སྐབས་སྤྲད་མ་སོང་། གལ་སྲིད་ང་ལ་སྐད་ཆ་བཤད་པའི་གོ་སྐབས་བྱུང་ཚེ་ངས་རང་གི་ཁྱོ་གར་ང་ཚོ་ནང་མི་ཉེ་ འབྲེལ་ཚང་མ་ཁྱེད་ལ་སྤོབས་པ་སྐྱེ་བཞིན་ཡོད་ལ། མི་མང་བོས་ཁྱེད་རང་མི་བཟང་ཞིག་ཡིན་པའི་དོ་སྣང་བྱེད་ཀྱིན་འདུག ང་ཚོ་ནང་མི་ཚོའི་ཆེད་དུ་སེམས་ཁྲལ་མ་བྱེད། ཁྱོད་རང་ཉིད་ཀྱི་ལུས་པོར་བདག་གཅེས་བྱེད་རོགས་ཞེས་བཤད་འདོད་ཡོད་ཟེར། ཡང་ཀརྨ་བསམ་འགྲུབ་ཀྱི་བཟའ་ཟླ་སྒྲོལ་དཀར་མཚོ་མོས་ཕྱི་ཚེས་ ༢༢ ཉིན་ཨེ་པེ་གསར་ཁང་ལ་བརྗོད་དོན། ཀརྨ་བསམ་འགྲུབ་ལ་གོང་ཚེས་ཉིན་ཞིན་ཅང་གི་ཡང་ཆི་རྫོང་ཞེས་པར་ཁྲིམས་བཤེར་བྱས་ ཡོད་པ་དང་། ཉིན་དེར་ཁོང་གིས་ཁྲིམས་ཁང་ནང་དུ་གསལ་བསྒྲགས་ཤིག་སྤེལ་ཏེ། ལོ་འདིའི་ཕྱི་ཟླ་ ༡ པོའི་ཚེས་ ༣ ཉིན་ཁོང་ཉིད་འཛིན་བཟུང་བྱས་པ་ནས་བཟུང་འདྲི་བརྩད་བྱེད་མཁན་ཉེན་རྟོག་པ་དག་ གིས་ཁོང་ལ་ཉེས་རྡུང་བཏང་བ་དང་ཚད་ལས་བརྒལ་བའི་མནར་གཅོད་བཏང་བའི་སྐོར་ཞིབ་ ཕྲའི་ངང་བཤད་པ་མ་ཟད། ཐ་ན་ཁོང་གི་རྣ་ནང་ནས་ཁྲག་ཐོན་པའི་རྫས་སྦྱོར་བྱེད་སྤྱོད་བྱས་ཚུལ་བཤད་ཡོད་ འདུག ཀརྨ་བསམ་འགྲུབ་ལགས་ཀྱི་སྤུན་རིན་ཆེན་བསམ་གྲུབ་དང་འཇིགས་མེད་རྣམ་རྒྱལ་གཉིས་ ལོ་སྔོན་མའི་ཕྱི་ཟླ་ ༨ པའི་ནང་འཇུས་ཡོད་ལ། ཉེས་འགེལ་ནི་རྒྱལ་ཁབ་ཀྱི་བདེ་འཇགས་པ་གནོད་པའི་བྱ་བ་སྤེལ་བར་བཤད་ཡོད་པ་རེད། ཁོང་གཉིས་ཀྱིས་ཁམས་ཨ་ཆུང་སེང་གེ་གནམ་རྫོང་དང་བླངས་ཁོར་ཡུག་སྲུང་སྐྱོབ་ཚོགས་ པ་ཞེས་པ་བཙུགས་ཤིང་། རྒྱ་ནག་གི་ལས་བྱེད་དག་གིས་ཡུལ་དེའི་རི་སྐྱེས་སྲོག་ཆགས་རྣམས་བདའ་བཞིན་པའི་ སྐོར་ཞུ་གཏུགས་བྱས་པར་བརྟེན་འཇུས་ཡོད་པ་རེད། ཡིན་ཡང་། རྒྱ་ནག་གཞུང་གིས་ཁོང་གཉིས་ཀྱིས་ཁྲིམས་འགལ་གྱི་ཐོག་ནས་ཁོར་ཡུག་དང་འབྲེལབའི་ གནས་ཚུལ་བསྡུ་རུབ་བྱས་ཤིང་། རྒྱལ་ཁབ་ཀྱི་བདེ་འཇགས་ལ་གནོད་པའི་ལས་ཀ་བྱས་ཚུལ་གྱི་ཉེས་འཛུགས་བྱས་ཡོད་པ་ རེད། ཀརྨ་བསམ་འགྲུབ་ལགས་ཀྱིས་ཕྱི་ཚེས་ ༢༢ ཉིན་རང་ལ་ཉེན་རྟོག་པས་ཉེས་རྡུང་བཏང་བ་དང་ཚད་ལས་བརྒལ་བའི་མནར་གཅོད་བཏང་སྐོར་ འགྲེལ་སྐབས། འདས་པའི་ལོ་ཕྱེད་ལྷག་གི་རིང་ཁོང་ཤིན་ཅང་པཱ་ཀྲིག་ཟེར་བའི་ས་དེར་བཀག་ཉར་བྱས་ པ་དང་། ཁོང་ལ་ཉིན་ལྟར་ཆུ་ཚོད་བཅུ་གྲངས་འགའ་ཤས་འདྲི་རྩད་བྱས་པ་དང་ཁྱོན་སྡོམ་འདྲི་ རྩད་ཐངས་ ༩༠ ལྷག་བྱས། འདྲི་རྩད་བྱས་ཐེངས་རེ་རེར་རྐུབ་སྟེགས་ཐོག་ཏུ་ཐེངས་གསུམ་རང་བསྡད་བཅུག་པ་ཕུད། དེ་མིན་ཚང་མ་ཉེན་རྟོག་པས་ཁོང་གནམ་ཐག་རྒྱག་པ་དང་ལག་པ་རྒྱབ་ཏུ་གཅུས་པ་སོགས་ ཀྱི་མནར་གཅོད་བཏང་བས། སྐབས་དེ་དག་ཏུ་ཁོང་དྲན་པའང་ཐེངས་འགར་འཐོར་ཚུལ་སོགས་གསུངས། ཡང་ཁོང་གིས། ཐ་ན་ཁོང་གི་སྣ་རུ་སྨན་རྫས་ཤིག་བཙན་གྱིས་བླུགས་པས་ཀླད་པར་ཟིལ་ཁ་སྟེར་བ་མ་ཟད། མགོ་ལས་ཁྲོག་ཁྲོག་གི་སྒྲ་སྒྲོག་པ་དང་། མིག་དང་རྣ་བ་དག་ལས་ཀྱང་ཁྲག་དམར་འཛགས་ཡོང་མོད། སྐབས་དེར་ཉེན་རྟོག་པ་དེ་ཚོས་ད་དུང་། “འདི་སྤྱོད་ཆོག་པ་སྤྱི་བདེ་ལས་ཁུངས་ནས་ཆོག་མཆན་ཡོད་པས་ཁྲིམས་དང་མཐུན་པ་ཞིག་ རེད། ཁྱོད་འཆི་གི་མ་རེད”ཅེས་བརྗོད་སྐོར་སོགས་ཁོང་ལ་བཙོན་ཁང་དུ་མི་ཆོས་ལས་འདས་ པའི་མནར་གཅོད་སྣ་ཚོགས་བཏང་བའི་སྐོར་རེ་རེ་བཞིན་ཞིབ་འགྲེལ་གནང་ཡོད། ཁོང་གི་ཁྲིམས་རྩོད་པ་ Pu Zhiqiang ལགས་ཀྱིས། ང་ཚོར་ཀརྨ་མ་བསམ་འགྲུབ་ཁྲིམས་བཤེས་སྐབས་ཁྲིམས་ཁང་གི་ཡིག་ཆ་སྔོག་པ་དང་ཁོང་ དཀར་འདོན་བྱེད་རྒྱུའི་ཁུངས་སྐྱེལ་ཡིག་ཆ་འཚོལ་རྒྱུར་དུས་ཚོད་ལྡང་ངེས་བྱུང་མ་ སོང་། ལྷག་པར་དུ་ཁོང་དང་ཐུག་འཕྲད་སྐབས་སུན་བཙུར་མང་བོ་བྱས་སོང་། ཞེས་དང་། ཁོང་གིས་ད་དུང་ཀརྨ་བསམ་འགྲུབ་ལགས་སུ་ཐེངས་འདིར་ཚད་མཐོ་ཤོས་ཀྱི་ཁྲིམས་ཆད་ ཕོག་སོང་ཞེས་བརྗོད་ཡོད།
