སྐྱེས་སར་ཀླུ་སྒྲུབ།
ཆོས་ལུགས་པ་ཞིག་གི་ངོས་ནས་བསམ་ན། རང་གི་བློ་སྣ་འཁྲིད་བྱེད་ཀྱི་བསྟན་པ་དང༌། བསྟན་པ་དེ་འདོམས་པར་མཛད་མཁན་གྱི་སྟོན་པའི་གནས་རྣམས། རང་ཉིད་ལ་ཆོས་ལུགས་དེ་ཅི་ཙམ་རྩ་ཆེ་བ་དེ་བཞིན་བསྟན་པ་དར་ས་དང༌། སྟོན་པ་བཞུགས་ས་དེ་གལ་འགངས་ཆེན་པོ་ཞིག་ཡིན་པ་སྨོས་མ་དགོས། དེར་བརྟེན་སངས་རྒྱས་ཆོས་ལུགས་པ་ཞིག་ལ་ཆ་བཞག་ན། སངས་རྒྱས་ཤཱཀྱ་ཐུབ་པ་སྐུ་བལྟམས་པ་ནས་མཐར་སྐུ་མྱ་ངན་ལས་མ་འདས་པའི་བར་མཛད་པ་ ཅི་རིགས་བསྟན་པའི་གནས་ཆེན་རྣམས་ཀྱི་བྱུང་བ་ཤེས་རྟོགས་བྱེད་ྱུ་དང༌། དེར་གནས་མཇལ་ཞུ་རྒྱུ་སོགས་ནི་སངས་རྒྱས་ཆོས་ལུགས་པ་ཞིག་ལ་མཚོན་ན་ཆོས་ཀྱི་ བྱེད་སྒོ་གལ་ཆེན་ཞིག་ཡིན་པ་རེད། སངས་རྒྱས་ཆོས་ལུགས་ཀྱི་བྱུང་རབས་རྣམས་སུ་སངས་རྒྱས་རང་གི་ཞལ་ནས་མ་འོངས་པར་ སངས་རྒྱས་རང་གི་མཛད་ཆེན་ཁག་ཏུ་མཇལ་སྐོར་ལ་ཡོང་མཁན་མང་པོ་ཡོདྟབས། དེ་སོ་སོར་སངས་རྒྱས་ཀྱི་གནས་ཆེན་རྣམས་སྟོན་དགོས་ཚུལ་གསུངས་ཡོད་པ་རེད་ཅེས་ འཁོད་འདུག དེ་མིན་ཤེས་རིག་ཞིབ་འཇུག་པ་དང་ལོ་རྒྱུས་སྨྲ་བ་ཞིག་གི་ངོས་ནས་བསམ་ན་ཡང༌། སངས་རྒྱས་ཆོས་ལུགས་ནི་འཛམ་གླིང་གི་ཤེས་རིག་བང་མཛོད་ནང་གི་འོད་སྟོང་འབར་བའི་ ནོར་བུ་རིན་པོ་ཆེ་ཞིག་ཡིན་པས། དེ་འདྲའི་འཛམ་གླིང་གི་ཤེས་རིག་ལོ་རྒྱུས་ནང་གི་ཆེས་བཀུར་བར་འོས་པའི་རླབས་ ཆེན་གྱི་མི་སྣ་ཞིག་གི་གཟི་བརྗིད་ལྡན་པའི་ལོ་རྒྱུས་ཀྱི་བྱ་གཞགྩོམ་ས་དེ། འཛམ་གླིང་འདིའི་སྐྱེས་བུ་རྣམ་དཔྱོད་ཅན་དག་གིས་ཀྱང་དགའ་གུས་ཡི་རང་ངང་ཤེས་ རྟོགས་བྱེད་ཡུལ་ཞིག་ཆགས་ཡོད། བགྲང་བྱ་ ༢༥༠༠ ཡར་སྔོན་ཤར་གླིང་ཨེ་ཤ་ཡའི་ཁོངས་སུ་བྱུང་བའི་རྟེན་ཅིང་འབྲེལ་འབྱུང་ངམ་ཆོས་ ཐམས་ཅད་རང་བཞིན་གྱིས་མ་གྲུབ་པའི་ཚད་མཐོའི་ལྟ་གྲུབ་དང༌། སེམས་ཅན་ཐམས་ཅད་བྱམས་བརྩེའི་དཀྱིལ་འཁོར་གཅིག་གི་ནང་འཚོ་དགོས་པའི་ལམ་སྟོན་ གནང་མཁན་དེ་ད་ཆ་མཇལ་ཐུབ་ཐབས་མེད་རུང༌། ཁོང་གི་ཟབ་བརླིང་གི་དགོངས་བཅུད་ཀྱིས་ཕྱུག་པའི་ལེགས་བཤད་ཀྱི་དཔེ་ཚོགས་དང༌། ཁོང་གི་རླབས་ཆེན་གྱི་མཛད་པ་ཅི་རིགས་བསྟན་པའི་གནས་མཆོག་འཁྲུལ་མེད་རྣམས་དངོས་ མཇལ་བྱེད་རྒྱུ་བྱུང་བ་ནི། ཆོས་དང་ལོ་རྒྱུས་གང་ཐད་ནས་རླབས་ཆེན་གྱི་གྲུབ་འབྲས་ཤིག་དྲན་གསོ་བྱེད་པའི་ལས་ དོན་ཞིག་ཀྱང་ཆགས་ཡོད། ལྷག་དོན་ཁ་གསལ་གྱིས་བཤད་ན། ཆོས་ལུགས་ག་གེ་མོའི་སྟོན་པར་གྲགས་པ་ཕལ་མོ་ཆེ་འཇིག་རྟེན་འདིར་བྱུང་ཚུལ་ཞིག་ ཤོད་ཀྱི་ཡོད་རུང༌། དོན་དམ་ཡང་སྙིང་ཤོད་སྲོལ་མང་པོ་ཞིག་ལོ་རྒྱུས་ཀྱི་དོན་དངོས་དང་མི་མཐུན་ཡང༌། དེ་ཚོ་འདིར་བཤེར་བགྲང་བྱེད་རྒྱུར་དགོས་པ་ཅི་ཞིག་ཡོད། ཡིན་ཡང་ལྟ་བ་རྟེན་འབྱུང་དང་སྤྱོད་པ་འཚེ་བ་མེད་པའི་ལྟ་སྤྱོད་ཀྱི་དེད་དཔོན་ བླ་ན་མ་མཆིས་པ་སངས་རྒྱས་བཅོམ་ལྡན་འདས་སམ། ཡོངས་གྲགས་སུ་གཽ་ཏམ་བྷུདྷ་ཁོང་ནི་སྐུ་གང་དུ་འཁྲུངས་པ་ནས་མཐར་སྐུ་མ་གཤེགས་པ་ ཚུན་ཆད་ཀྱི་ལོ་རྒྱུས་རང་བཞིན་ལྡན་པའི་ས་གནས་ཁག་རྫུན་བཟོ་དརྟོག་བཏགས་ལྟ་བུ་ མིན་པར། དངོས་སུ་མཇལ་ཏུ་ཡོད་པ་འདི་ཉིད་གཽ་ཏམ་བྷུདྷའི་ཆོས་ལུགས་དང༌། ལྟ་གྲུབ་ཀྱི་ལོ་རྒྱུས་ལ་དངོས་ཡོད་ཀྱི་རྒྱབ་གཉེར་ཚད་ལྡན་ཞིག་བྱུང་བར་བགྲང་ ཆོག གཽ་ཏམ་བྷུདྷ་སྐུ་གཤེགས་ནས་ལོ་བརྒྱད་ཅུ་ཙམ་ཞིག་ལ་རྡོ་རྗེ་གདན་དང༌། ཝཱ་རཱ་ཎ་སཱི། རྒྱལ་པོའི་ཁབ་བཅས་སུ་མཆོད་རྟེན་བཞེངས་མགོ་ཚུགས་པ་ནས་བཟུང། ཕྱི་ལོའི་དུས་རབས་བཅུ་གསུམ་པ་ཙམ་གྱི་བར་མུ་མཐུད་ཁོང་གི་གནས་ཆེན་རྣམས་སུ་ལྷ་ ཁང་དང༌། མཆོད་རྟེན་གང་མང་བཞེངས་ནས་གནས་ཀྱི་སྙན་པ་ཆེས་ཆེར་གྲགས་ཁར། ཕྱི་ལོའི་དུས་རབས་ལྔ་བ་དང་བདུན་པ། བཅུ་གསུམ་པ་སོགས་སུ་བོད་རྒྱའི་ལོ་པཎ་ཇི་སྙེད་ཅིག་རྒྱ་གར་དུ་ཕེབས་ནས་སྐབས་ སོ་སོའི་གནས་ཚུལ་ཡིག་ཐོག་ཟིན་བྲིས་སུ་བཏབ་པར་བརྟེན། སངས་རྒྱས་ཀྱི་གནས་རྣམས་ཇི་བཞིན་ངོས་འཛིན་བྱེད་རྒྱུར་དཀའ་ངལ་དེ་ཙམ་མེད་པ་ ཆགས་འདུག། དཔེར་ན། དུས་རབས་ཉི་ཤུ་པར་ནང་པའི་གནས་ཆེན་ཁག་འཚོལ་ཞིབ་བྱེད་སྐབས་རྒྱའི་བཙུན་པ་ཧྥ་ ཤཱན་དང༌། ཐང་སན་ཙང༌། ཡི་ཅིང༌། བོད་ཀྱི་ཆག་ལོ་ཙཱ་བ་སོགས་ཀྱི་ལམ་ཡིག་གིས་འདི་འབྲེལ་ཉམས་ཞིབ་སོགས་ལ་ཕན་ཐོགས་ ཧ་ཅང་ཆེན་པོ་བྱུང་ཡོད། ཨ་མདོ་དགེ་འདུན་ཆོས་འཕེལ་གྱིས་ཀྱང༌། དེ་ལྟའི་ཡིག་རྙིང་ཚད་ལྡན་ཁག་ལ་གཞི་བཅོལ་ནས་རྒྱ་གར་གནས་ཡིག་བརྩམས་པར་བརྟེན། དུས་སྐབས་ངེས་ཅན་ཞིག་གི་རིང༌། རང་རེ་བོད་མི་ཚོར་ཕན་ཐོགས་ཆེན་པོ་བྱུང་ཡོད། ད་ལན་གུས་པས་རྒྱ་གར་ནང་པའི་གནས་ཡིག་ཅེས་པ་འདི་ཉིད་རྩོམ་སྒྲིག་བྱེད་སྐབས་ ཀྱང་དེ་སྔའི་ཡིག་རྙིང་ཁག་གཞི་ལ་བཞག་ནས་རྩོམ་སྒྲིག་བྱས་ཁར། ལམ་ཐག་རིང་ཐུང་གི་སྤྱི་ལེའི་ཚད་དང་མགྲོན་ཁང་སོགས་ཀྱི་སྐོར་གུས་རང་ས་གནས་ས་ ཐོག་ཏུ་ཆེད་བསྐྱོད་ཀྱིས་ཟིན་བྲིས་འདེབས་དགོས་རིགས་གསར་འདེབབྱས་པས། གནས་ཡིག་འདིའི་ནང་གི་གནས་ཆེན་སོ་སོའི་འགྲེལ་བཤད་དང༌། འགྲིམ་འགྲུལ་ལམ་སྟོན་གང་ཅིར་ཡིད་རྟོན་འཕེར་ངེས་ཀྱི་རམ་འདེགས་ཆེན་པོ་བྱུང། དེ་མིན་ཕྲན་ལ་མཚོན་ན། རྟེན་འབྱུང་གི་ལྟ་གྲུབ་དང༌། བྱམས་བརྩེའི་ལམ་སྟོན་ལ་རིང་ནས་མོས་གུས་བྱེད་མཁན་ཞིག་ཡིན་པ་རྒྱུ་མཚན་དུ་བྱས་ ནས་སངས་རྒྱས་དང༌། ཁོང་གི་ལྟ་སྤྱོད་ལ་སྙིང་ནས་དགའ་ཞེན་བྱེད་ཀྱི་ཡོད་ལ། ད་ལན་སངས་རྒྱས་ཀྱི་གནས་ཆེན་ཁག་གི་གནས་ཡིག་འདི་ལྟ་བུ་ཞིག་བཟོ་རྒྱུའི་དགོས་ དམིགས་ཀྱང༌། མཐར་གཏུགས་ན། རང་གི་གུས་བརྩི་དང་དགའ་ཞེན་བྱེད་སའི་ལྟ་སྤྱོད་གསར་བཏོད་གནང་མཁན་ཁོང་གི་མཛད་ རྗེས་དང་འབྲེལ་བའི་གནས་ཆེན་རྣམས་མང་ཚོགས་ལ་མཚམས་སྦྱོར་བྱེརྒྱུ་དང༌། གཉིས་སུ་བོད་རིགས་མི་དམངས་ལ་ཕན་རེས་རྩོམ་སྒྲིག་བྱས་པ་ཞིག་ཡིན། གནས་ཡིག་འདི་རྩོམ་སྒྲིག་བྱས་པའི་བརྒྱུད་རིམ་ཁྲོད། རོགས་རམ་གནང་མཁན་ཡོངས་ལ་སྙིང་ཐག་པ་ནས་བཀའ་དྲིན་ལེགས་གསོལ་དང་རྗེས་དྲན་ཞུ་ རྒྱུ་བཅས། ཕྱི་ལོ་ ༢༠༠༨ ཟླ་ ༢ ཚེས་ ༢༢ ཉིན་རྩོམ་སྒྲིག་པས་གུས་འདུད་བཅས་ཕུལ།
